Bashkohuni me grupin tonë zyrtar në Facebook duke klikuar këtu!
Festivali Europian i Këngës, Eurovision Song Contest 2016 nis në datën 10 maj me gjysëmfinalen e parë. Të tri netët e festivalit, 10, 12 dhe 14 maj, do të transmetohen në ekranin e Televizionit Shqiptar, në RTSH muzikë, RTSH HD si dhe në transmetim radiofonik në valët e Radio Tirana.
Në këtë edicion të 61-të do të konkurojnë 42 shtete midis tyre edhe Shqipëria. Kjo është pjesëmarrja jonë e 13 në skenën e Festivalit Europian dhe këtë vit prezantohemi me këngëtaren Eneda Tarifa me këngën “Fairytale (Love)“, versioni anglisht i këngës fituese “Përrallë“ në FiK 54. Shqipëria konkuron në natën e dytë gjysëmfinale, datë 12 Maj.
Transmetimi i tri netëve do të përcillet live në rrjetin e RTSH, në komentin e Andri Xhahu, i cili natën finale do të jetë në lidhje direkte me skenën e festivalit për të anonçuar pikët e dhëna nga publiku shqiptar nëpërmjet televotimit. Ky është viti i pestë që gazetari i Radio Tiranës konfirmohet si komentues dhe prezantues i pikëve të Shqipërisë në Eurovision Song Contest.
Vitin e kaluar Andri Xhahu bëri zhurmë me veshjen e tij në daljen e prezantimit të pikëve gjatë transmetimit live, duke u komentuar gjerë në median vendase dhe ate të huaj. Jemi kurioz të shohim se çfarë do të propozojë këtë vit Andri në look-un e tij!
