Pas një mungese të gjatë prej më shumë se një dekade, “Albania’s Got Talent” rikthehet në ekranin shqiptar, këtë herë nën moderimin e prezantuesit të njohur Isli Islami. Spektakli i talenteve, që do të transmetohet çdo të hënë në orën 21:00 në Vizion Plus, ka ngjallur interes të madh nga publiku, i cili pret me padurim të shohë talente nga fusha të ndryshme të performancës, që do të konkurrojnë për çmimin e madh.
Sezoni i parë i “Albania’s Got Talent” u transmetua fillimisht në vitin 2010 në Top Channel, duke qenë një ndër formatet më të suksesshme të asaj kohe, i prezantuar nga Albana Osmani dhe Benet Kaci. Në atë sezon të parë, juria përbëhej nga Altin Basha, Rovena Dilo, dhe Armend Rexhepagiqi, të cilët ndihmuan në zgjedhjen e fituesve, Fiqiri Luli dhe Sabrina Troushku.
Pasi largohet nga Top Channel, rikthimi i Isli Islamit në këtë format ka qenë një surprizë e mirëpritur nga fansat e tij dhe nga publiku i gjerë. Në këtë sezon të dytë, Islami premton një atmosferë të freskët dhe emocionuese, ku pjesëmarrësit do të kenë mundësinë të tregojnë talentin e tyre në një spektakël tërheqës dhe plot energji, duke sjellë prurje të reja dhe performanca të jashtëzakonshme për të gjithë publikun shqiptar.
