Formula tjetër e suksesshme nga gjigandi “Endemol”, “Your Face Sounds Familiar”, shumë shpejt do të fillojë edicionin e dytë të transmetimit në Shqipëri. Pas eksperiencave të suksesshme në më shumë se 30 vende të botës dhe pas suksesit në edicionin e parë në Tv Klan, ky format do të nisë në janar edicionin e dytë. Dhe sonte, gjatë mbrëmjes finale të “Dance With Me” është zbuluar emri i parë që do të jetë konkurrent në këtë edicionin. Pak minuta më parë, Alketa Vejsiu ka zbuluar se i pari konkurrent që do të jetë pjesë e këtij kasti është Xum Allushi.
Gjatë këtij edicioni të DWM, Xumi ka qenë një karakter i spikatur, së bashku me partneren e tij, Fjolla Morina. Bashkë me interpretimin e tij artistik, Xumi është kthyer në një personazh të pëlqyer të publikut.
“Your Face Sounds Familiar” është një talent show, i cili ka filluar për herë të parë në Spanjë dhe ka protagonistë personazhe të njohur të botës së spektaklit (aktorë, këngëtarë, personalitete televizive, sportistë etj.), të cilët do të prezantojnë para një jurie profesioniste performanca të yjeve të ndryshme të muzikës. Duke “u maskuar” si këngëtarë të njohur, ata do të përpiqen jo vetëm të këndojnë si ata, por edhe të përshtaten në fizik, në moshë dhe në gjini. Spektakli do të nisë edicionin e dytë së shpejti në Tv Klan.
