Këngëtari i njohur shqiptar nga Maqedonia e Veriut, Shpat Kasapi, është ndarë nga jeta në moshën 40-vjeçare. Sipas mediave, artisti ka pësuar një arrest kardiak gjatë një koncerti në Bologna, Itali, ku ndodhej për të performuar. Edhe pse nuk raportohej të kishte pasur probleme të mëparshme shëndetësore, fatkeqësisht ai nuk ka mundur të mbijetojë.
Kasapi ishte një nga emrat më të dashur të muzikës shqiptare. I lindur më 1 maj 1985 në Tetovë, ai u rrit në një familje me traditë muzikore, gjë që i hapi rrugën drejt artit që në moshë të re. Në fillim të viteve 2000, Shpati u bë shpejt një prej figurave më të pëlqyera të rinisë, me stilin modern, meloditë e lehta dhe energjinë karakteristike në skenë. Këngët e tij u kthyen në hite që mbeten të paharruara edhe sot, mes tyre “A më do?”, “Valle Kosovare”, “Dashni pa limit”, “Aroma e saj” e shumë të tjera.
Gjatë karrierës, ai mori pjesë në festivale të rëndësishme dhe solli bashkëpunime që lanë gjurmë në tregun shqiptar dhe atë kosovar, duke u kthyer në një emër të konsoliduar të skenës.
Në jetën personale, në vitin 2021 Shpati u martua me Selvije Jaos, ndërsa para një viti çifti i dha fund marrëdhënies, edhe pse ishin bërë prindër të një djali.
Reagimet prekëse të artistëve shqiptarë
Lajmi për vdekjen e parakohshme të Shpat Kasapit ka shkaktuar tronditje të madhe në mbarë publikun dhe komunitetin artistik. Kolegë, miq dhe figura të njohura të ekranit kanë shprehur dhimbjen e tyre për humbjen e artistit, duke e kujtuar si njeri të mirë, pozitiv dhe plot jetë.
Vesa Luma shkroi ndër të tjera:
“Na trishtove shumë Shpat… Ishe një nga njerëzit më të mirë e më pozitiv që kam njohur. Një djalë fisnik e plot jetë, ashtu si këngët e tua që rritën një brez të tërë. Dritë pastë shpirti yt. Ngushëllime familjes, miqve dhe kolegëve.”
Edhe Arbana Osmani ka ndarë kujtimet e saj nga vitet e Top Fest:
“Shumë i dhimbshëm lajmi për largimin nga jeta të Shpat Kasapit, me të cilin pata fatin të punoj më shumë se 20 vite më parë dhe ta ftoj në skenë me dhjetëra herë. Faleminderit për muzikën, energjinë dhe buzëqeshjet e pakursyera që na ke dhuruar.”
Nga ana e saj, Dafina Zeqiri shprehu tronditjen:
“Nuk mundem me besu këtë lajm… Ti gjithmonë ke qenë i mirë me ne, gjithmonë pozitiv. Kështu do të të mbajmë mend, për energjinë e mirë dhe muzikën që na dhurove.”
I prekur ka qenë edhe Ermal Fejzullahu, i cili e cilësoi Shpatin mik të fëmijërisë:
“Nuk po muj me besu… e filluam karrierën bashkë dhe pata shumë kujtime të bukura me ty. Na theve zemrat Shpat.”
Ndërsa reperi dhe producenti Big Basta theksoi karakterin e tij të rrallë:
“Të gjithë kolegët e dimë çfarë djali i mrekullueshëm ke qenë! I sjellshëm dhe zemër i madh. Humbje e madhe për të gjithë.”
Humbja e Shpat Kasapit lë pas një boshllëk të madh në muzikën shqiptare, por këngët, energjia dhe mirësia e tij do të mbeten përherë të paharruara për publikun që e ka dashur dhe ndjekur prej më shumë se dy dekadash.
