One Macedonia, degë e grupit hungarez 4iG Group, ka marrë zyrtarisht licencën kombëtare për operim si operatori i tretë mobil në Maqedoninë e Veriut, duke shënuar një zhvillim të rëndësishëm për tregun e telekomunikacionit në vend.
Licenca u dorëzua sot në një ceremoni zyrtare të organizuar nga Agjencia për Komunikime Elektronike (AEK), ku morën pjesë përfaqësues të institucionit rregullator, drejtues të One Macedonia dhe përfaqësues të mediave kombëtare. Ky hap vjen pas përfundimit me sukses të procedurave për ndarjen e spektrit radiofrekuencor.
Investim strategjik dhe rol rajonal
Gjatë ceremonisë, Pal Zárándi, kryetar i Bordit të Drejtorëve të One Macedonia dhe drejtor për strategjinë mobile në 4iG Group, theksoi se hyrja në tregun maqedonas nuk është thjesht lançim i një operatori të ri, por pjesë e një strategjie afatgjatë zgjerimi në të gjithë Ballkanin Perëndimor.
Sipas tij, Maqedonia e Veriut ka një pozicion të rëndësishëm gjeostrategjik në projektet e mëdha të infrastrukturës digjitale, përfshirë korridorin e ri digjital Evropë–Afrikë, i lidhur me projektin e kabllit nëndetar Shqipëri–Egjipt dhe iniciativën “Shtylla Ballkanike”, të mbështetur nga Komisioni Evropian. Në këtë kontekst, vendi pritet të luajë rol kyç si nyje rajonale për qarkullimin e të dhënave.
Zárándi nënvizoi gjithashtu rëndësinë gjeopolitike të vendit, duke theksuar se statusi i Maqedonisë së Veriut si vend anëtar i NATO-s e bën atë të rëndësishëm jo vetëm ekonomikisht, por edhe nga aspekti i sigurisë dhe teknologjive kritike.
Deri në 100 milionë euro investime
One Macedonia planifikon të investojë deri në 100 milionë euro në ndërtimin dhe zhvillimin e rrjetit të saj, përfshirë infrastrukturën, krijimin e vendeve të reja të punës, trajnime profesionale dhe bashkëpunim afatgjatë me kompani vendase të sektorit ICT.
Drejtori ekzekutiv i One Macedonia, Brano Gjuroviç, deklaroi se kompania synon të sjellë një qasje të re në treg:
“Ne nuk hyjmë vetëm për të konkurruar, por për të kontribuar realisht. Pa infrastrukturë të trashëguar, kemi mundësinë të ndërtojmë një rrjet më efikas, më të shpejtë dhe më të sigurt. Ambicia jonë është të bëhemi një shtyllë digjitale e besueshme për Maqedoninë e Veriut.”
Vetëm për licencën, kompania ka investuar më shumë se 8 milionë euro, duke konfirmuar angazhimin për zhvillim afatgjatë dhe partneritete lokale, në përputhje të plotë me standardet e sigurisë dhe rregulloret e Bashkimit Evropian.
Rëndësia për tregun dhe konsumatorët
Nga ana e tij, drejtori i AEK, Jeton Akiçiku, vlerësoi se dhënia e licencës përfaqëson një moment kyç për zhvillimin digjital të vendit, duke hapur tregun për konkurrencë të re dhe duke krijuar kushte për shërbime më cilësore, inovacion dhe infrastrukturë më të sigurt për qytetarët.
Ceremonia u mbyll me një qëndrim të përbashkët për mbështetjen e një tregu konkurrues dhe të qëndrueshëm të telekomunikacionit, që pritet të sjellë përfitime afatgjata për ekonominë dhe shoqërinë.
Rreth One Macedonia
One Macedonia është operatori më i ri mobil në Maqedoninë e Veriut, i themeluar për ndërtimin e një rrjeti digjital të sigurt dhe me kapacitet të lartë. Kompania është në pronësi të plotë të 4iG Group dhe planifikon të lançojë një rrjet 5G Standalone (SA) të bazuar në standarde evropiane, duke përdorur furnizues të besueshëm si Ericsson.
Rreth 4iG Group
4iG Group është një nga korporatat më të mëdha të telekomunikacionit dhe teknologjisë së informacionit në Evropën Qendrore dhe Ballkanin Perëndimor. Me prani aktive edhe përmes ONE Albania dhe ONE Montenegro, grupi u shërben miliona përdoruesve privatë dhe biznesorë në rajon dhe është i fokusuar në ndërtimin e rrjeteve të sigurta dhe moderne digjitale.
