Për herë të parë në Shqipëri, vjen formati global më i ndjekur humoristik në histori dhe formati më i shitur në historinë e televizionit ndërkombëtar – “Love Bugs”.
I transmetuar për herë të parë në Kanada në vitin 1997, “Love Bugs” ka mbërthyer para ekranit miliona shikues në më shumë se 30 vende të botës, si Francë, Itali, Greqi, Suedi, Amerikë etj. dhe së fundmi Serbi, ku si në çdo vend tjetër, theu rekorde shikueshmërie në YouTube, me më shumë se 15 milionë shikime.
Seriali “Love Bugs”, format komedie, vjen në shqip me titullin e përshtatur në “Tenxherja – Kapakun” dhe bazohet në situata të përditshme dhe komike të jetës së një çifti. Kasti përbëhet nga një emër shumë i famshëm që ka dominuar skenën shqiptare në 2 dekadat e fundit dhe një emër mjaft i njohur që ka spikatur në komedi dhe është pjesë e një programi tepër të ndjekur. Të dy protagonistët janë personazhe shumë të dashur për publikun.
Producente e “Tenxherja – Kapakun” është Jokansa Kuqi, themeluese e Urbanus Group, kompania që po sjell formatin në fjalë në standardet më të larta në rajon. Përshtatja e skenarit në shqip i është besuar Dalina Buzit falë përvojës së saj së gjatë si skenariste në prodhime të ndryshme, si seriali “$NOB”, web-series “Hostel by Anabel”, “#Love #Likes #Tirana” apo festivale si “Kënga Magjike” dhe prodhime të tjera televizive.
“Jemi lumtur që të arrijmë së bashku suksesin më të madh në industrinë e filmit duke përfaqësuar për herë të parë Shqipërinë në një patentë globale 25-vjeçare,” u shpreh producentja Kuqi.
“Tenxherja – Kapakun” do të transmetohet prime time në televizion dhe YouTube në vjeshtë të këtij viti.
