The Voice of Albania 5|Nata e parë – Përmbledhja e zgjedhjeve të trajnerëve

Prej vitit 2001 jeton në Leçe. Është diplomuar për ekonomi dhe ka marrë studime kantoje privatisht. Kur ka qenë e vogël ka fituar një çmim të dytë, në një festival fëmijësh, në L’Aquila të Italisë. Ka qenë pjesë e shumë aktiviteteve muzikore: Festivale, Talent-show, Festival della Musica e della Moda. Eshtë e angazhuar së bashku me mamin në punën e saj si estetiste, por dëshira e saj është muzika, fotografia, kërcimi, letërsia dhe udhëtimet. Në Itali ka punuar me një bandë që luante muzikë tradicionale italiane. ‘The Voice’ i duhet si një eksperiencë dhe sfidë, por edhe për t’u provuar talentin, atyre që nuk kanë pasur besim te aftësitë e saj.

Adioni ka 7 vjet që ka mbaruar liceun në Berat për kanto, por që atëherë nuk është ushtruar më në fushën e muzikës.  Rrugëtimi i tij në botën e muzikës është mjaft i çuditshëm. Ka nisur akademinë e arteve në Tiranë për kanto, por e ka ndërprerë. Më pas ka fituar një konkurs për të vazhduar sërish për muzikë në Itali, por sërish u tërhoq. Pas këtyre peripecive me shkollën, Adioni punon si banakier në lokalet në Berat nga mëngjesi në mbrëmje. Ai thotë se mungesa e vullnetit ka bërë që shumë gjëra në jetën e tij të kenë mbetur në mes të rrugës. Vjen në ‘The Voice’ për t’i hapur vetes një mundësi të re. Jo vetëm për të shpluhurosur sërish pasionin për të kënduar si shumë vite më parë, por pse jo edhe për të hapur një dritare të re në jetën e tij. Këtë radhë shprehet se ka vullnetin e duhur për ta bërë këtë.

Lorenci studion në lice për violë, por i bie dhe pianos dhe kitarës. Ndonëse në moshë mjaft të re, ai ka një karrierë shumë të pasur muzikore, që zë fill në moshën 15-vjeçare. Prej dy vitesh, ai këndon live në baret e lokalet më të njohura të kryeqytetit, si dhe ka një grup të tij muzikor me emrin “Turtles”. Konkurset muzikore i shikon pak me dyshim pasi, sipas tij, janë “thikë me dy presa”, ose ngjitesh në maja ose humbet shumë pikë. Por më në fund ai ka vendosur të marrë pjesë në ‘The Voice’, jo vetëm për të shtuar publicitetin për grupin e tij, por edhe të spikasë si vokalist. Ai shprehet se nuk është i kënaqur mesa ka arritur deri tani. Me pjesëmarrjen në ‘The Voice’ kërkon të vendosë standarde më të larta tek vetja si muzikant profesionist.

Ina ka një ndodhi shumë interesante në jetën e saj. Tek merrte pjesë në një tjetër konkurrim muzikor, që përfundoi si një përvojë zhgënjyese, mori vendimin për të mos u marrë më me muzikë. Nga ana tjetër, ky vendim ngjalli jo pak debate në rrethin e saj miqësor, i cili vazhdimisht ngulmonte që ajo të mos hiqte dorë nga muzika. Ishte ky presion i shoqërisë, ai që bëri që ajo sërish t’i rikthehej muzikës, këtë radhë duke aplikuar për në ‘Voice’.  Sipas saj, ‘The Voice’ do të jetë një start i ri, pasi beson në profesionalizmin e trajnerëve.  Aktualisht, ajo studion për inxhinieri ndërtimi dhe për të përballuar jetesën punon dhe në një Call Center.

Almeida vjen në ‘The Voice’ nga qyteti i vogël i Memaliajt, e frymëzuar nga dëshira e talenti, por edhe nga emrat e njohur të ekranit, që e kanë prejardhjen nga qyteti i saj.  Ajo shprehet se është e dashuruar pas muzikës, por dëshiron që të ndjekë fakultetin e mjekësisë, që mënyrë që në ardhmen të bëhet gjinekologe. Megjithatë, lidhjet e forta që ka me artin, si mbesë e aktorit Medi Malka,i cili i ka zëvendësuar edhe figurën e të atit, që nuk jeton më, e shtyjnë Almeidën që të ndjekë instinktin e lindur e të trashëguar. Ajo kërkon të ndryshojë realitetin për veten dhe familjen e saj. Almeida ka marrë pjesë edhe në ‘Voice Kids’.

Ka kënduar që kur ka qenë e vogël nëpër festa, por edhe ka kërcyer, sepse edhe baleti është pasioni tjetër i saj, prandaj edhe është angazhuar si balerinë dhe për momentin studion për koreografi. Ka kënduar disa herë në disa koncerte të vogla. Synimi i saj  është që të jetë show-girl. ‘The Voice’ mund të jetë hapi më i mirë për të filluar një karrierë në televizion. I pëlqejnë shumë artistet e huaja dhe frymëzohet prej tyre. Dëshira e saj është që të bëjë një koncert të sajin, bashkë me një trupë baleti.

Dega e studimeve që ka zgjedhur Fjoralba është rrjedhojë e profesionit të prindërve: i ati stomatolog dhe e ëma mjeke. Ka kohë që është angazhuar edhe ajo në klinikën e të atit, duke ushtruar profesionin për të cilin po studion. Ajo ka marrë pjesë në konkurs shkollash të mesme, në vit të parë, është marrë me aktrim në gjimnaz dhe tetëvjeçare. Gjithashtu, ka marrë pjesë në dy konkurse brenda vendit dhe një jashtë,  për make up dhe ka fituar një çmim të parë dhe një të dytë. Është marrë edhe me ping pong dhe me kick boks. ‘The Voice’ e do për një eksperiencë ndryshe, por nuk do ta sakrifikonte punën që e pret në klinikë dhe profesionin e sigurt që ka zgjedhur, për muzikën.

Pasionin e tij e ndan mes muzikës dhe aktrimit, duke pasur pretendime për të dy zhanret. Është pjesë aktive e aktiviteteve të shkollës dhe është gjimnazist shumë ambicioz. Nuk është mjaftuar vetëm me koncertet brenda mureve të shkollës, por shfrytëzon rastin për t’u shfaqur edhe në aktivitete jashtë saj, gjë që e ka bërë të fitojë siguri në aftësitë e tij si këngëtar. Vjen në ‘Voice’ për një eksperiencë serioze, që e mendon si fillimin e duhur për rrugën e tij. Është shumë pasionant dhe i sigurt në vetvete.