Në “Për’puthen Prime”, mbrëmjen e së shtunës, u eleminuan Hyseni dhe Bajo, djemtë qës ishin përfshirë në një konflikt fizik me Brunon. Veç tyre, vajzat eleminuan edhe tre konkurentë të tjerë, për të cilët nuk kishin interes: Dorin, Artanin dhe Aleksin.
Ndaj, këtë javë kanë nisur hyrjet e reja, të cilat vajzat mezi po i prisnin, siç edhe vetë ato u shprehën. Sot u prezantuan dy djemtë e parë, por siç moderatorja Bora Zemani tha, hyrje të reja do të ketë edhe në vazhdim gjatë ditëve.
I pari ishte Erjon Kukaj, 25 vjeç, nga Prizreni, ku punon, jeton dhe studion. I pyetur nga Ada, se çfarë i pëlqen tek ajo, ai tha se e tërhiqte që ishte një vajzë e pavarur. Mikela sipas tij, kishte një veçori që i bënte për vete djemtë.
I dyti ishte Igli Berdo, nga Vlora, basketbollist, që jeton prej 11 vitesh në Tiranë. Ai tha se për momentin nuk e ushtron profesionin. Që në hyrjen e tij, u vunë re ngjashmëritë me Alvisën, por gjatë bisedës tha se ka diçka që pëlqen tek të gjitha, mirëpo tek secila shihte një veçori, ndryshe nga të tjerat. Simpati ai shprehu veçanërisht për Adën, për të cilën tha se s’ka asgjë për të mos u pëlqyer.
