Vizion Plus ka nisur sot sezonin e ri televiziv duke prezantuar njëkohësisht edhe një ndryshim të rëndësishëm të identitetit të tij vizual. Logoja e njohur e televizionit i lë vendin një simboli të ri, ndërsa ndryshimi shtrihet edhe në faqosjen grafike dhe mënyrën se si prezantohen programet në ekran dhe në platformat digjitale.
Nga materialet e publikuara nga televizioni, logoja e re ndërtohet mbi një “V” të stilizuar, të kombinuar me simbolin “+”. Dy elementet bashkohen në një shenjë të vetme, shumë më minimale dhe kompakte se identiteti i mëparshëm.
Edhe emërtimi vizual në rrjetet sociale tashmë shfaqet me këtë simbol të ri, ndërsa slogani që shoqëron prezantimin është:
“VIZION PLUS. Plus për ty. Plus për të gjithë.”
Nga logoja te një sistem i plotë grafik
Ajo që bie në sy është se Vizion Plus nuk është kufizuar vetëm te ndryshimi i logos.
Te grafikat e sezonit të ri dominojnë blu e thellë, e bardha dhe nuancat elektrike të blusë, ndërsa format tridimensionale dhe linjat e lakuara krijojnë vazhdimësi me simbolin e ri.
Është një gjuhë vizuale dukshëm më digjitale dhe më minimale, e menduar jo vetëm për ekranin tradicional televiziv, por edhe për Instagram, video vertikale dhe platformat online.
Në komunikimin e programacionit është përdorur gjithashtu një strukturë e unifikuar: emri i programit në tipografi të bardhë, etiketa portokalli “Sezon i ri”, fotografia kryesore dhe orari i transmetimit.
Kjo i jep të gjithë programacionit një identitet të përbashkët, në vend që çdo format të komunikohet me një stil grafik krejtësisht të ndryshëm.
Edhe programacioni nis të marrë formë
Bashkë me identitetin e ri, Vizion Plus ka zbuluar edhe një pjesë të skedës që shoqëron nisjen e sezonit.
“7 pa 5” transmetohet nga e hëna në të shtunë në orën 06:55, ndërsa “Mes’Dritë” vijon në 09:00.
Në fashën e pasdites, seriali “Fat i Hidhur” është programuar nga e hëna në të shtunë në 15:40, i ndjekur nga “Trashëgimtari” në 18:00. Seriali “Zilia” transmetohet nga e hëna në të premte në 20:00, ndërsa “E-Zone” ruan hapësirën e së dielës në 19:40.
Televizioni e përshkruan këtë si vetëm fillimin e një sezoni që do të sjellë “risi e surpriza ditë pas dite”.
Një Vizion Plus më modern
Nga këndvështrimi i branding-ut televiziv, ndryshimi është i konsiderueshëm.
Logoja e re është shumë më e përshtatshme për mënyrën se si konsumohet sot media. Simboli V+ mund të funksionojë si logo në ekran, avatar në rrjetet sociale, ikonë aplikacioni apo element grafik brenda videove pa pasur nevojë për emrin e plotë të televizionit.
Veçanërisht interesante është mënyra se si “+” nuk qëndron më thjesht pas fjalës Vizion, por bëhet pjesë aktive e vetë simbolit. Kjo i jep markës një element që mund të përdoret shumë më lehtë në animacionet dhe identet televizive.
Nga materialet e para duket gjithashtu se Vizion Plus po tenton të krijojë një sistem më koherent mes ekranit dhe rrjeteve sociale — një element gjithnjë e më i rëndësishëm për televizionet, pasi një pjesë e konsiderueshme e përmbajtjes së tyre tashmë konsumohet jashtë ekranit tradicional.
Pas një periudhe të gjatë me identitetin e njohur të Vizion Plus, V+ hap kështu një kapitull të ri vizual për televizionin, pikërisht në ditën e nisjes së sezonit të ri.
