Ndryshe nga njerëzit që zgjedhin të mos publikojnë foto të fëmijëve në rrjete sociale, të tjerët zgjedhin të veprojnë ndryshe, madje edhe të krijojnë një llogari personale për fëmijët në Instagram. Kujtojmë këtu disa nga personazhet e njohur shqiptarë, fëmijët e të cilëve kanë një llogari në Instagram: Hana – vajza e Mozzik dhe Loredanës, Jon Markov – djali i Adelina Tahirit, Roan – djali i Majkut dhe Majlinda Zekës, Fernando – djali i Çiljetës, Kaia – vajza e dytë e aktores Teuta Krasniqi, Ella Faria – vajza e Emina Cunmulajt, Kaimana – vajza e Linda Halimit, Tian – djali i Tunës dhe Patris Berishës. Së fundmi, edhe vajza e Ledri Vulës dhe Sara Hoxhës, Poem Blu, ka një llogari.
Por a duhet që prindërit të krijojnë llogari në Instagram për fëmijët e tyre? Le ta shtrohim çështjen në një këndvështrim pro dhe kundër.
Përfitimet
- Përdorimi për përfitime: Shumë prindër krijojnë llogari për fëmijët në Instagram, në mënyrë që të mund ta përdorin atë për të promovuar produkte, dyqane dhe shërbime për fëmijët, kundrejt pagesës/kleringut. Me fjalë të tjera, këta prindër mund të bëhen blogerë/influencues përmes faqeve të fëmijëv.
-
Një album fotografik virtual: Instagram është një platformë e mirë për ndarjen e fotove dhe videove të fëmijëve dhe jo vetëm. Prindërit mund ta përdorin llogarinë si një formë për të dokumentuar kujtimet.
-
Është gjithmonë dikush që vëzhgon: Disa prindër i dinë rreziqet e ndarjes së fotove të fëmijës në internet, por mendojnë se nëse ata janë duke u vëzhguar vazhdimisht, pse të mos jenë ata që të postojnë fëmijët e tyre. Të paktën, kanë në kontroll përmbajtjen.
Rreziqet
- Krahasimi: Është e lehtë që prindërit të kenë pasiguri. Duke postuar foto nëpër rrjete sociale, është shumë e thjeshtë që të vendosen në një presion për të qenë në të njëjtin hap me prindërit e tjerë. Mund të ndihen sikur nuk po bëjnë sa duhet.
Privatësia: Disa njerëz argumentojnë se prindërit nuk e kanë të drejtën të postojnë fotot e fëmijëve në internet pa pëlqimin e tyre. Disa prindër mendojnë se fëmijët duhet të kenë të drejtë të thonë po ose jo para se jeta e tyre të dokumentohet në internet. Kjo vlen më shumë për rastet kur prindërit janë të njohur. Ekzistojnë gjasat që fëmijët e VIP-ave të mos duan më vonë të jenë njerëz publikë. Po kështu rreziku i internetit dihet: është e lehtë të ekspozosh fëmijët ndaj ngacmuesve dhe pedofilëve.
Pëlqimet dhe komentet: Disa prindër ndihen keq kur fëmijët e tyre nuk marrin vëmendjen që ata mendojnë se duhet të marrin. Por, më e keqja, janë komentet negative. Po, ka njerëz që mund të shkojnë kaq larg: Të komentojnë negativisht një fëmijë.
Përmbledhje
Zgjedhja nëse fëmija juaj duhet të ketë një llogari personale në Instagram varet vetëm nga ju. Merrni parasysh të gjitha arsyet pro dhe kundër përpara se të merrni një vendim. Mos harroni – ajo që postohet në internet, mund të qëndrojë aty përgjithmonë.
