Aktorja Drew Barrymore vendosi të “distancohet publikisht” nga Woody Allen, duke thënë se “u manipulua” për të punuar me të.
46-vjeçarja pranoi përballë vajzës së adoptuar të Allen, Dylan Farrow, se ajo pendohet që u bë pjesë e filmit “Everyone Says I Love You”, në 1996-ën – 4 vite pasi Dylan Farrow akuzoi Allen për abuzim seksual gjatë kohës kur ishte fëmijë.
“Në atë kohë, nuk kishte arritje më të madhe se të punoje me Allen”, u shpreh Barrymore gjatë bisedës.
“Pastaj u bëra vetë me fëmijë dhe kjo më ndryshoi. Kuptova që në thelb isha një nga njerëzit që u manipuluan për të mos parë përtej asaj që ishte.”
Dylan Farrow, tani 35 vjeç, i tha se “e vlerëson mbështetjen”, duke thënë se “e di që duhet guxim për të folur në Hollywood”.
“Ka shumë vlerë për mua. Është e lehtë të them: Sigurisht që s’duhet të punoje me të. Ai është një përbindësh etj, por unë mendoj se është shumë e guximshme dhe e mirë nga ana jote që historia ime dhe ajo që unë kalova mjaftoi që ti ta rikonsideroje vendimin tënd.”
Në serialin-dokumentar “Allen v. Farrow”, Dylan foli gjerësisht në lidhje me abuzimin që “pretendohet të ketë përjetuar” në verën e vitit 1992. Në një nga seritë, shfaqet dhe një video e papublikuar më parë, xhiruar nga mamaja e Dylan, Mia Farrow. Videoja tregon Dylan 7 vjeç teksa e ëma pretendon se Allen e ka prekur në mënyrë të papërshtatshme në papafingon e shtëpisë.
Allen, tani 85 vjeç, nuk u akuzua dhe nuk u ndoq penalisht asnjëherë. Pesë vite pas akuzës, ai u martua me vajzën e adoptuar të partneres së tij të vjetër (Mia-s), Soon-Yi Previn. (Lexo më shumë për këtë: Si Woody Allen u martua me vajzën që adoptoi e dashura e tij.)
Në një deklaratë në shkurt, Allen tha për dokumentarin:
“Këto seri nuk kishin asnjë interes për të thënë të vërtetën. Ata thjesht kaluan duke vite duke bashkëpunuar në mënyrë të fshehtë me familjen Farrow për të krijuar një tufë me gënjeshtra.”
