Pas tërheqjes nga gara të Edea Demaliaj, arsyet e të cilës nuk i bën të ditura, sipas formulës së Festivalit të Këngës në RTSH e para në listpritje në këtë edicion ka qenë këngëtarja Orgesa Zaimi, e cila automatikisht është bërë zyrtarisht një nga këngëtaret në garë të edicionit të 54.
Orgesa Zaimi është bërë pjesë e këtij festivali pasi ka kaluar të gjitha fazat dhe formulat që janë ndjekur ndër vite.
Javët e fundit Orgesën e kemi parë si moderatore në RTSH me emisionin “Music & Music” dhe të shumtë kanë qenë ata që kanë menduar se pjesëmarrja e saj në Fest 54 ka qenë e favorizuar nga ky fakt. Vetë këngëtarja para shpalljes së 30 këngëtarëve fitues në garë, pati informuar publikisht fansat se ajo kishte aplikuar për të qenë pjesë e Fest 54. E kontaktuar nga IMA ajo na tregon:
“Në Festival dorëzova këngën në tetor ndërsa programi “Music & Music” nisi në mes të nëntorit, nuk kam pasur asnjë favorizim përsa i përket atyre që mund të kenë menduar të kundërtën. Ftesa për emisionin më është bërë shumë muaj më parë. Janë dy gjëra që s’kanë aspak lidhje me njëra-tjetrën”. Me vjen shume mire qe kete vit cdo gje eshte surprize ne festival, e thene kjo gara eshte e fortë dhe askush s’është favorit. Mbetet të presim mbremjet në Pallatin e Kongreseve”
Orgesa konkuron për herë të parë në Festivalin e RTSH-së, me këngën “Një shishe në oqean” shkruajtur nga Agron Tufa, me muzikë të Diana Ziu dhe orkestrim të Sh. Saraci / E.Sina.
Orgesa Zaimi një zë tashmë të njohur prej vitesh në muzikën e rrymës së re në Shqipëri, ajo ka sjellë larmishmëri dhe ngjyra në këngë.
Festivali i këngës në RTSH do të mbahet në datat 25,26 dhe 27 dhjetor. Në dy netët e para do të degjohen nga 15 këngë, prej të cilave do të përzgjidhen 9 këngë për çdo natë. Në natën finale do të ketë 18 këngë.
Fituesi i Fest 54 do të marrë pjesë në Festivalin Europian të Këngës Eurovision Song Contest, që mbahet vitin e ardhshëm në Stokholm të Suedisë më 10,12 dhe 14 maj.
