Gazetarja Donika Mustafaj vjen para publikut me dokumentarin e saj të dhjetë, titulluar “Kur kënga nuk ishte Pazar” prodhim i Radio Televizionit Shqiptar. Brenda gjashtëdhjetë minutave gazetarja Mustafaj, bën zbërthimin estetik të këngës shqiptare, veçanërisht ato kushtuar dashurisë. Përballë teksteve të dikurshme të këngëve për dashurinë, ajo vendos tekstet e këngëve të sotme, ku për shkak të komercializmit ato dominohen nga instinkti dhe seksi i egër.
“Më përpara ne këndonim ‘Hanko, mos shko në varre, se të gjallët i vdiqe fare e të vdekurit i ngjalle’, ndërsa sot, nga ana tjetër, ne këndojmë ‘jam bombë e du me shpërthy’, etj etj. Pra, e shikoni se çfarë tekstesh kemi? Unë mendoj se këngët e sotme nuk kanë tekst, nuk kanë mesazh. Mesazhi, për të cilin unë flas tërë kohës në dokumentarin tim, është shumë i nevojshëm për secilin nga ne. Ka qënë dhe është shumë i nevojshëm. “
Siç thotë vetë, Mustafaj nuk merr përsipër të gjykojë mbi cilësinë artistike të tekstit dhe as të muzikës së këtyre këngëve, por të pasqyrojë përmbysjen që ka pësuar konceptimi i dashurisë në këto këngë.
“Qëndroj tek tekstet, jo për të parë se sa i bukur ka qënë një tekst më përpara, por thjesht për dashurinë, sepse dihet që themeli i të gjitha këngëve është dashuria. Dhe thashë, se si e kemi deformuar ne konceptin e dashurisë. Pra, është ky koncept në realitet që ne e kemi deformuar, apo është kënga që e ka deformuar këtë koncept duke e ‘veshur’ nga ana artistike dhe duke na e servirur neve”
Sipas Mustafajt përballë trekendeshit krijues-këngëtar-media qendoron publiku, i cili fatkeqësisht ushqehet çdo ditë me këtë produkt mediokër dhe pa vlerë.
