Xhesika Polo ishte një nga konkurrentet e Festivalit të Këngës të këtij viti me këngën “Më Mbron”.
Kënga ishte një dedikim i ndjerë për të ëmën, që i ndërroi jetë në fillim të këtij viti. Mirëpo, edhe pse kënga meritonte të gjithë vëmendjen që mund t’i vinte këngëtares, sërish veshja ka bërë të sajën.
Ka mjaftuar një foto, ku Xhesika shfaqet me veshjen e natës së parë, ku për shkak të dritës duket sikur është veshur me një veshje të tejdukshme për të trazuar rrjetin. Mjaft persona e kanë kritikuar duke e quajtur veshje të papërshtatshme dhe jo dinjitoze.
Pasditen e sotme ka ardhur edhe reagimi nga këngëtarja e cila shkruan ndër të tjera se veshja nuk ka qenë e tejdukshme dhe se ata që kanë hedhur baltë ndaj saj do të përballen me instancat përkatëse.
“Më vjen keq për mendjen e sëmurë që tregon ajo foto e bërë në atë mënyrë, që ndjesia e vetme që morën nga kënga ime ishte të shkrepnin me vrap këtë foto dashkeqe që të ndiheshin pak më mirë për veten. Veshja ime nuk është transparente dhe kjo shihet qartë në foton me cilësi”, – shkruan Xhesika.
“Kushdo që ka njollosur imazhin tim do të përballet me instancat përkatëse sepse nuk është normale të lëndoni njerëzit dhe të flini rehat. Se di si ju zë gjumi. Unë gjithsesi do fle shumë e qetë sot pasi kam bërë një këngë shpirti që e kanë vlerësuar dhe e kanë dashur mijëra njerëz dhe për mua kjo ka rëndësi”, – përfundon këngëtarja.
Kjo është hera e dytë që Polo përballet me të tilla kritika, pas fustanit në vitin 2017 që u kritikua për dekoltenë.
