Diodato fitues i Sanremo 2020

Pas plot pesë netësh spektakël, që kaloi më shumë se 30 orë transmetimi, Sanremo ka një emër fitues për edicionin jubilar të 70-të të tij. Ai është Diodato me “Fai rumore”. Fituesi i vendit të parë mori 46 vota, Francesco Gabbani 15 vota, ndërsa Pinguini Tattici Nucleari ka marrë 13 vota.

Amadeus, drejtori artistik dhe moderator i këtij edicioni, ia doli që t’u rikthente italianëve vëmendjen nga Sanremo, duke kaluar më shumë se 54 përqind shikueshmërinë. Nga nata në natë, elementët e spektaklit e sjellë në skenë edhe nga Rosario Fiorello, e bënë këtë edicion të 70-të të këngës italiane të mbahet mend gjatë e të komentohet si një ndër më të ndjekurit e pothuaj 40 viteve të fundit.

Sanremo 2020 do të mbahet mend edhe për pjesëmarrjen mbresëlënëse të prezantueses shqiptare Alketa Vejsiu, e cila pak kohë më parë prezantoi Fest ’58 në Tiranë. Vejsiu, një talent i rrallë i mediave shqiptare, prezantoi me elegancë dhe klas krah Amadeus-it duke tërhequr vëmendjen e mediave italiane dhe shqiptare .

Festivali i 70-të i Sanremos, eventi më i rëndësishëm muzikor në Itali u transmetua direkt ne RTSH, televizioni publik shqiptar. Ai tradicionalisht është ndjekur nga shqiptarët që në vitet e diktaturës komuniste. Sanremo dhe vetë televizioni italian RAI janë konsideruar si një dritare ku Shqipëria komuniste shikonte perëndimin. Jo pak shikues të tij kanë patur punë në atë kohë me organet e diktaturës komuniste.

REKLAMA
loading...

KOMENTO

This site uses Akismet to reduce spam. Learn how your comment data is processed.