Festivalin e RTSH-së, Marko Strazimiri: Kënga i plotësonte kriteret

Në puntatën e parë të emisionit “Thumb On”, që startoi në ekranin e RTV Ora, pjesë e diskutimit është Festivali i RTSH-së.

Mospranimi i këngës së Marko Strazimirit në festival shkaktoi debate të nxehta. Kompozitorja e këngës “Mos”, Diana Ziu sulmoi në rrjetet sociale organizatoren e festivalit Vera Grabocka.

Ndërsa këngëtari Marko Strazimiri tha për “Thumb On” në RTV Ora se kënga i plotësonte kriteret dhe nuk e kupton pse nuk u pranua.

Strazimiri u shpreh së është i zhgënjyer nga Festivali, por theksoi se do vazhdojë të konkurrojë.

Marko Strazimiri: “Jam shumë i zhgënjyer të themi të drejtën për sa i përket Festivalit. Duke qenë një pjesëmarrës vitin e kaluar dhe duke fituar një çmim goxha të rëndësishëm si “Çmimi i të rinjve”, ishte një çmim që sapo ishte futur  atë vit, dhe duke fituar atë mendoja se këtë vit do futesha automatikisht në festival. Por mesa duket e kam pasur gabim.

Diana Ziu ka qenë mësuese e të gjithë njerëzve që njohim sot në botën e artit, Pandi Laço siç njihet nga të gjithë ka tekstet më të mira në Shqipëri dhe Enis Mullaj ka qenë personi që bëri produksionin e këngës që na përfaqësoi vjet në Eurovision.  Nuk e kuptoj se ku është problemi, ku qëndron ajo gjëja që nuk më pranuan festival.

Kënga u punua shumë thjesht, u dorëzua në kohë siç ishte kërkuar dhe po prisnin përgjigjen nëse ishte pranuar apo jo. Duke pritur me ankth morëm përgjigjen që nuk ishte pranuar, ishte refuzuar kënga. Në atë moment nisi revolta jonë. Unë personalisht me Vera Grabockën akoma nuk kam pasur një bisedë konkrete dhe shpresoj që ta shohë këtë intervistë e të dëgjojë të gjitha fjalët që jam duke thënë dhe ti marrë në konsideratë.

Festivali shtetëror sot është ajo organizatorja, nesër nuk është dhe mua nuk më prish asnjë punë për sa kohë që ne kemi një këngë që i plotëson të gjitha kriteret unë do marr pjesë.”

Marrë nga Ora News.tv

REKLAMA
loading...

KOMENTO

This site uses Akismet to reduce spam. Learn how your comment data is processed.