Aktori i njohur i humorit Agron Llakaj ka ndarë një moment të veçantë nga e kaluara e tij, duke treguar për një periudhë të rëndësishme të jetës së tij përpara se të ndiqte karrierën artistike. Në një status të publikuar në profilin e tij në Instagram, ai rikujton me nostalgji punën e tij në minierën e qymyrgurit në Memaliaj, ku ka punuar për shtatë vite nëntokë.
Agroni ndan kujtimet e tij për kohën e kaluar me miq të afërt dhe bashkëpunëtorë nga ato vite, duke përmendur me respekt Myzafer Abedinin, ish-aktor kryesor i trupës amatore, dhe Rakip Zhupën, instrumentist, kompozitor dhe kinooperator në Shtëpinë e Kulturës. Në foto kujtim të publikuar, ai tregon se shpesh i quanin “Nashot e pallatit të kulturës,” duke përmendur gjithashtu një mik tjetër të afërt, Agim Lika, regjisori, i cili tani ndodhet në Amerikë.
Agron Llakaj e përshkruan Memaliajn, vendlindjen e tij, si një vend të varfër, por me një “minierë floriri të shpirtit njerëzor,” duke treguar dashurinë dhe respektin e tij për vendin ku ka kaluar një pjesë të rëndësishme të jetës së tij përpara se të bëhej një nga aktorët më të dashur të humorit shqiptar.
