Sezoni i gjashtë i programit të dashurisë “Për’puthen,” i cili ka thyer rekorde shikueshmërie në vitet e kaluara, rikthehet këtë vjeshtë në ekranin e Top Channel me një fytyrë të re në moderim—Megi Pojanin. Ky ndryshim ka ngjallur interes të madh te ndjekësit, të cilët presin me padurim se çfarë do të sjellë ky sezon i ri.
“Për’puthen” është një nga programet më të ndjekura në Shqipëri, duke bërë një bujë të madhe me formatin e tij që sjell përballë njëri-tjetrit të rinj që kërkojnë dashurinë. Me një miks emocionesh, dramash dhe situatash të papritura, ky “reality show” ka mbajtur publikun të ngjitur pas ekranit për pesë sezone me radhë.
Ky sezon i ri pritet të jetë edhe më suprizues, duke parë interesin e shtuar të të rinjve gjatë audicioneve. Megi Pojani, e njohur për stilin e saj të drejtpërdrejtë dhe energjinë pozitive, ka deklaruar se është gati të marrë drejtimin e programit dhe të sjellë një eksperiencë të freskët për ndjekësit.
“Me pëlqen kur pritshmëritë janë shumë të larta, sepse e di që do i përmbushim pa asnjë diskutim, por edhe do i tejkalojmë,” ka thënë Pojani. Ajo shtoi se koncepti i “Për’puthen” është i tillë që të ndihmon të sjellësh gjithmonë diçka të re dhe interesante.
Sezoni i ri premton jo vetëm surpriza në skenarin e programit, por edhe një angazhim të fortë të publikut, i cili është një pjesë thelbësore e suksesit të “Për’puthen.” Me një format që ka evoluar me kalimin e viteve dhe një moderatore të re që ka energji të pashtershme, “Për’puthen” është gati të vijojë të jetë një nga programet më të ndjekura në televizionin shqiptar.
