Festivali i këngës italiane këtë vit do të organizohet nga data 6 deri në 10 shkurt. Pesë mbrëmje nga qyteti i Sanremo-s do të vazhdojnë traditën e këngës italiane, por me një ndryshim të madh në formulë, këtë herë nuk do të ketë eliminime gjatë katër netëve, por të gjitha këngët do të shkojnë në natën finale.
Gjithashtu edhe nga formula e prezantimit priten surpriza. Prezantuesi kryesor do të jetë një nga emrat më të njohur të muzikës italiane, Claudio Baglioni. Atij i është besuar dhe roli i drejtorit artistik të festivalit, siç ka ndodhur vitet e fundit me Carlo Conti-n.
Këngëtari do të shoqërohet në prezantim nga Michelle Hunziker dhe aktori Pierfrancesco Favino, dy emra dhe figura të njohura brenda dhe jashtë Italisë.
Mes artistëve interpretues, siç dihet tashmë, do të jetë dhe shqiptari Ermal Meta që këtë vit vjen në duet me Fabrizio Moro-n.
Janë plot 20 këngëtarë që do të kërkojnë çmimin e parë, i cili do të përfaqësojë Italinë në Eurovision, ndërkohë që për çmimin e të rinjve konkurrojnë tetë artistë.
