Më 2 shtator kryeministri i vendit Edi Rama prezantoi kabinetin e ri qeveritar që shkaktoi menjëherë një impakt shumë pozitiv. Kjo për shkak të prezencës së madhe të grave me 70.6%. 4 ministra dhe 12 ministre është ky raporti i kabinetit qeveritar për 4 vitet e ardhshme ndërsa në krye të Kuvendit të Shqipërisë është vendosur një tjetër grua, Lindita Nikolla.
Qeveria “Rama 3” ka shkaktuar impakt edhe në vendet e tjera, sidomos në Itali. Media prestigjioze si “La Repubblica” dhe “Vanity Fair Italia” i kanë kushtuar shkrime të gjata zgjedhjeve të kryeministrit Rama për kabinetin e tij qeverisës.
“Një qeveri grash për Shqipërinë: Rama zgjedh 12 ministre dhe 4 ministra” ishte ky titulli i “La repubblica” që vijon më pas shkrimin:
“Pas disa muajsh negociatsh të ashpra midis partive e zgjedhjeve të mbajtura më 25 prill dhe trazirave anti-korrupsion, kryeministri i Shqipërisë dhe lideri socialit Edi Rama donte të jepte shenjën e ndryshimit duke emëruar një qeveri të re të përbërë nga 12 gra dhe vetëm 4 meshkuj”.
Ndërkohë, “Vanity Fair Italia” shkruan: “Shqipëri, lind qeveria me më shumë gra në botë” . E formuar nga 70.6% gra, qeveria shqiptare bëhet qeveria me numrin më të lartë të grave në botë, e ndjekur nga Spanja, ku dy të tretat e ministrave janë gra dhe Finlanda (61%).
Artikulli nga “Vanity Fair Italia”:
Një qeveri e formuar nga tre të katërtat gra.
Kryeministri dhe lideri socialist shqiptar Edi Rama, pas zgjedhjeve të 25 prillit, donte të jepte një sinjal të prekshëm ndryshimi, duke emëruar 12 gra ministre (të cilave u janë besuar departamente shumë të rëndësishme, pikërisht ndërkohë që Shqipëria – konservatore dhe pjesërisht myslimane – kërkon të përshpejtojë hyrjen në Bashkimin Evropian) dhe 4 ministra meshkuj.
Në qeverinë e re, të njohur si “Rama 3”:
Punët e Jashtme tani janë në duart e Olta Xhaçkës, Financat në duar të Delina Ibrahimajt, për Bujqësinë Frida Krifca, për Kulturën Elva Margariti, për Infrastrukturën Belinda Balluku, për Turizmin Mirela Kumbaro, për Arsimin Evis Kushi, për Shëndetësinë Ogerta Manastirliu. Ndër meshkujt e propozuar, Arben Ahmetaj është Zëvendëskryeministër, Bledi Cuci për punët e Brendshme, në Drejtësi është Ulsi Manja dhe Niko Peleshi ministër i Mbrojtjes.
4 ministra shteti janë:
Elisa Spiropali, Ministre për Marrëdhëniet me Parlamentin; Edona Bilali, Ministre për Mbrojtjen e Sipërmarrjes; Bora Muzhaqi, Ministre për Rininë dhe Fëmijët; Milva Ikonomi, Ministre për Standardet dhe Shërbimet.
E formuar nga 70.6% gra, qeveria shqiptare bëhet qeveria me numrin më të lartë të grave në botë, e ndjekur nga Spanja, ku dy të tretat e ministrave janë gra dhe Finlanda (61%). Megjithatë, qeveria e mëparshme e Ramës ishte gjithashtu një nga 14 qeveritë në botë me mbi 50% të posteve të mbajtura nga gratë.
Rama u përball me akuza rreth suksesit në zgjedhje, por në fjalën e tij, kryeministri mbrojti fitoren elektorale si legjitime dhe tha se një problem i rëndësishëm i politikës shqiptare mbetet ndarja e vendeve të punës në sektorin publik tek anëtarët e partisë në pushtet dhe të afërmve të tyre.