Provat e fundit të Fest ’58 në Pallatin e Kongreseve, për natën e fundit. Me 12 këngëtarë, ende në garë, të përzgjedhur mes 20 këngëve të natës së parë e të dytë nga një juri ndërkombëtare, e përbërë prej 5 anëtarësh. Sot do të ridëgjojmë, për t’i mësuar, kuptuar, vlerësuar edhe ne si publik, jo vetëm juria, këngët: “Shaj” nga Arilena Ara; “Me Tana” nga Elvana Gjata; “Me gotën bosh” nga Tiri Gjoci; “Botë për të dy” nga Olta Boka, “Eja merre” nga Era Rusi; Robert Berisha me “Ajo nuk është unë”, Gena me “Shqiponja e lirë”, Valon Shehu me këngën “Kutia e Pandorës”; Bojken Lako me këngën “Malasen”; Sara Bajraktari me “Ajër”; Kamela Islamaj me këngën “Më ngjyros” dhe Albërie Hadërgjonaj me “Ku ta gjej dikë ta dua”.
Pas Luan Xhegut, Agim Krajkës, Lindita Theodhorit, të ftuar në dy netët e para të festivalit, sot nata finale ka të ftuar një tjetër yll legjendar të skenës së festivaleve në RTSH, Ema Qazimin.
Nostalgjia nuk do të jetë vetëm me këngëtarë, por edhe muzikë të filmave shqiptarë si recitimi i vargjeve të Fan Nolit “Anës Lumenjve” nga Timo Flloko në filmin “Lulëkuqe” mbi mure e më pas muzika e tij, apo tinguj nga filmi “Dimri i fundit”, që kanë autorësinë e Kujtim Laros, Aleksandër Lalos etj..mishëruar nga trupa e baletit Albi Nako Dance.
Jo një por dy këngëtare me karrierë ndërkombëtare në Fest’ 58. Eleni Foureira, ose ndryshe Entela Fureraj me origjine nga Fieri, me karrierë shumë të suksesshme muzikore në Greqi, përfaqësuese e Qipros në Eurosong Contest 2019 ku me këngën Fuego mori edhe vendin e dytë, cila do të zërë plot 12 minuta të spektaklit të sotshëm. Eleni Foureira mbërrin pak para fillimit të natës finale.
Por edhe kantautorja italiane me famë të përbotshme, Giusi Ferreri, e popullarizuar sidomos për këngët “Non ti scordar mai di me”, Mos më harro kurre dhe “Novembre”, Nentori.
Në orën 21:00 drejtpërdrejt në ekranin e RTSH do të mund të ndiqni natën e tretë dhe të fundit të festës madhore të muzikës, festivalin legjendar të këngës në RTSH, Fest ’58, kënga kurorëzuese e të cilit do të përfaqësojë Shqipërinë në Festivalin Europian të Këngës, Eurosong Contest 2020 në Hollandë.
