Po merr rrugë edicioni i 53-të i Festivalit të Këngës në RTSH dhe dalëngadalë po mësohen të gjitha detajet që do t’a shoqërojnë atë në tre netët e festivalit në fund të dhjetorit, tek Pallati i Koncerteve.
Tashmë është hedhur shorti i radhës së konkurimit në dy netët gjysëmfinale dhe pikërisht sot janë publikuar edhe emrat që do të prezantojnë këtë edicion të këtij festivali. Drejtori i përgjithshëm i RTSH, Martin Leka, përmes një statusi në profilin zyrtar në Facebook ka publikuar tre emrat e prezantuesve, të cilët janë: Moderatori i njohur i Vizion Plus, Turjan Hyska, aktualisht moderator i programit “Oktapod”. Moderatorja dhe modelja e njohur e TV Klan, Floriana Garo, moderatore e programit “Jo Vetëm Modë”. Gjithashtu treshja e prezantuesve plotësohet me prezantuesen e njohur kosovare të programit “Prive” në Klan Kosova, Liberta Spahiu.
Rikthehet në prezantimin e këtij festivali për të dytin vit radhazi Floriana Garo, e cila edhe vitin e kaluar prezantoi në krah të moderatorit Enkel Demi. “Fest 53” do të mbahet LIVE tek Pallati i Koncerteve në datat 26, 27 dhe 28 dhjetor.
IMA / S. Dema