Mbrëmja e spektaklit “Dancing With The Stars” ka dhuruar sërish surpriza për të gjithë shikuesit nga ekrani i Vizion Plus. Përveç surprizës së produksionit me pranin e aktores italiane, Valeria Marini, ka patur edhe ngjarje të tjera të cilat kanë dhuruar emocione dhe debate në teatrin e yjeve të vallëzimit.
Gjatë kësaj mbrëmjeje ka patur një përplasje mendimesh dhe veprimesh mes Valerit dhe Tunës, në distancë. Valeri ka akuzuar gjatë gjithë javës nëpër gazeta të ndryshme që juria po mbështet Tunën, duke e vlerësuar me më shumë pikë, dhe se ajo nuk është më e mira. Gjithashtu ka tërhequr vëmendjen duke cilësuar mbështetjen që po i jep vetë Media Vizion, që sipas tij suporti po i bëhet edhe me kopertina revistash, duke nënkuptuar numrin e ri të revistës Living, ku Tuna këtë muaj është në kopertinë. Debati është rihapur në skenë, ku kërkohej një sqarim i plot i situatës. Megjithatë në një spektakël të tillë mund të ndodhin edhe çuditë në fakt. Dhe pikërisht Valeri, në ironi e sipër ka bërë gjestin që jemi mësuar ta shohim te Tuna, por këtë radhë në versionin mashkull. Zogu i Tunës sërish hapi probleme. Kjo nuk është pëlqyer aspak nga anëtarët e jurisë dhe më konkretisht nga Ema Andrea, e cila e kundërshtoi me forcë veprimin.
Gjakrat tashmë janë nxehur dhe në “Dancing With The Stars” po luftohet për të arritur më të mirin.
IMA / S. Dema
