5 raste të reja me Covid-19 janë regjistruar 24 orët e fundit në Berat. Të gjithë rezultojnë të jenë familjarët e punonjëses së bashkisë Berat E.D,që rezultoi te enjten “pozitive” me koronavirus. Njëra prej të infektuarve është Infermiere në Repartin e Kirurgjisë në Spitalin Rajonal të Beratit. Kjo ka vënë në alarm gjithë spitalin,ku pritet që sot të kryhen rreth 60 testime në të gjithë stafin (mjekë,infermierë e sanitarë) që kanë qënë çdo ditë në punë e në kontakt të vazhdueshëm me infermieren e prekur nga Covid-19.
Pas mbërritjes mëngjesin e sotëm të 42 testeve të kryera dje nga Drejtoria e Shëndetit Publik Berat,5 prej tyre rezultuan “pozitivë” dhe ata janë të gjithë familjarët e punonjëses së bashkisë E.D. Të prekur nga Covid-19 kanë rezultuar 2 prindërit e saj,motra,vëllai dhe vajza 2-vjeçe,ndërkohë që bashkëshorti ka rezultuar “negativ”. Drejtoria e Shëndetit Publik në Berat ka kryer dje 42 “tampone”,14 i përkisnin familjarëve të punonjës së bashkisë dhe 28 ishin punonjës në bashkinë e Beratit dhe persona kontakti me të. Të gjithë personat që kanë rezultuar “pozitivë” me Covid-19 në Berat janë karantinuar në banesat e tyre,ndërkohë që në bashkinë e Beratit,pas dezinfektimit të saj dhe mbërritjes së të gjitha rezultateve negative të punonjësve,puna vijon normalisht,duke respektuar masat e sigurisë.
Rastet e regjistruara këtë të premte e çojnë në 10 numrin e personave të prekur nga Covid-19 në Berat në dhe kjo rrezikon kthimin e qytetit nga “zonë e gjelbër” në “zonë të kuqe”.
