Një reklamë sensibilizuese e prodhuar në Gjermani është shndërruar në një mesazh viral që nxit kryesisht të rinjtë të qëndrojnë në shtëpi për të luftuar dhe parandaluar zgjerimin e mëtejshëm të coronavirusit.
Pamjet tregojnë në mënyrë retrospektive dy personazhe që tashmë janë të moshuar dhe kujtojnë periudhën e pandemisë, kur ata ishin të rinj. Përgjatë reklamës këta individë tregojnë se si duke qëndruar në shtëpi ata u shndërruan në heronj të luftës kundër COVID-19.
“Unë u vlerësova për performancën time mbresëlënëse në luftën kundër coronavirusit. Papritur isha një hero, një idhull, një qytetar model… Me qëllim që të parandalohej zgjerimi i virusit, qytetarëve iu kërkua të qëndronin në shtëpi. Papritur të bërit asgjë ishte një mënyrë për të ndihmuar komunitetin. Të ishe dembel mund të shpëtonte jetë”, thotë Tobi Schneider.
Reklama tashmë është bërë një video e parë nga miliona persona, pasi është transmetuar dhe ritransmetuar kudo në internet. Përkthimet në anglisht, spanjisht dhe gjuhë të tjera e bëjnë reklamën shumë herë më të aksesueshme nga të gjithë dhe si pasojë qytetarët, kryesisht të rinjtë marrin mesazhin e forte dhe nxitës që të respektojnë masat e vendosura për të parandaluar pandeminë.
“Qëllimi ynë me fushatën e “Heronjve të veçantë” ishte e qartë, pra ta shpërndaje mesazhin tek personat e rinj, të rriturit, nxënësit në shkolla, stazhierët dhe studentët. Të shmangësh kontaktet është momentalisht rruga më e rëndësishme dhe efektive në parandalimin e pandemisë”, tha Steffen Sibert, zëdhënës i qeverisë qjermane.
Megjithëse, Gjermania e ka menaxhuar mire pandeminë covid-19, duket se tashmë ka një rritje të numrit të të infektuarve me mbi 3.000 raste gjatë 24 orëve të fundit. Prandaj, “Divani ynë ishte fronti i luftimit dhe durimi ishte arma jonë” është shndërruar në një nga motot që nxit të rinjtë të respektojnë masat.
