Peter Parker ka bërë atë që Hollywood-i priste prej më shumë se një dekade. “Spider-Man: Brand New Day” ka kaluar “Star Wars: The Force Awakens”, duke marrë rekordin si filmi me arkëtimet më të larta të të gjitha kohërave në box office-in e Amerikës së Veriut.
Rekordi që dukej pothuajse i pathyeshëm ka rënë.
“Spider-Man: Brand New Day”, filmi i ri i Sony dhe Marvel, ka kaluar “Star Wars: The Force Awakens” në renditjen historike të arkëtimeve në SHBA dhe Kanada, sipas të dhënave të raportuara më 16 shtator.
Filmi i “Star Wars” mbante vendin e parë prej rreth një dekade, me afro 936.6 milionë dollarë të grumbulluara gjatë qëndrimit të tij në kinema. Vetëm pak ditë më parë, “Brand New Day” kishte arritur në 935.2 milionë dollarë dhe ndodhej rreth 1.4 milionë larg rekordit.
Tani kjo barrierë është kapërcyer. Variety raporton se filmi është bërë zyrtarisht titulli me arkëtimet më të larta në historinë e box office-it domestic, që në industrinë amerikane përfshin SHBA-në dhe Kanadanë.
Një ecuri e jashtëzakonshme
Suksesi nuk ka ardhur vetëm në fund të rrugëtimit. “Brand New Day” nisi me shifra rekord dhe u bë filmi që arriti më shpejt pragun e 900 milionë dollarëve në Amerikën e Veriut, duke e kaluar atë pas vetëm 36 ditësh.
Në javën e katërt filmi kishte arritur rreth 855 milionë dollarë në tregun domestic dhe 2.22 miliardë dollarë globalisht.
Në rang botëror, “Spider-Man: Brand New Day” ka kaluar tashmë 2.45 miliardë dollarë, duke u pozicionuar si filmi me arkëtimet më të mëdha të vitit 2026.
Suksesi i filmit ka kontribuar edhe në një verë jashtëzakonisht të fortë për kinematë. Sezoni veror 2026 në SHBA arriti rreth 4.7 miliardë dollarë, duke vendosur një rekord të ri për këtë periudhë.
Rekordi i “Star Wars: The Force Awakens” mbijetoi për rreth një dekadë. Tani kurora e box office-it amerikan i përket Spider-Man.
