Një pjesë e historisë së kinemasë shqiptare rikthehet në ekran. “Fëmijët e saj”, filmi i Hysen Hakanit i realizuar në vitin 1957, do të prezantohet në një version të restauruar, në një premierë të posaçme më 17 shtator 2026, ora 18:30, në Kinema Drita.
Ngjarja merr një rëndësi të veçantë pasi, sipas Arkivit Qendror Shtetëror të Filmit, bëhet fjalë për restaurimin e parë të realizuar në Shqipëri për filmin e parë shqiptar.
Restaurimi është kryer në studion e Arkivit Qendror Shtetëror të Filmit, nga Erand Meca dhe Deha, duke shënuar një hap të rëndësishëm për kapacitetet vendase në ruajtjen dhe rikthimin e trashëgimisë filmike shqiptare.
“Fëmijët e saj”, me regji të Hysen Hakanit, është prodhim i vitit 1957 dhe konsiderohet një pikënisje e rëndësishme në historinë e filmit artistik shqiptar.
Pikërisht për këtë arsye, premiera e versionit të restauruar nuk është thjesht rikthimi në ekran i një filmi të vjetër. Ajo përfaqëson edhe një mënyrë për t’ia prezantuar brezave të rinj një prej veprave që qëndron në themelet e kinematografisë shqiptare, tashmë të rikuperuar përmes teknikave bashkëkohore të restaurimit.
Premiera do të zhvillohet të enjten, më 17 shtator, në orën 18:30, në Kinema Drita, pranë Arkivit Qendror Shtetëror të Filmit.
