Pirateria audiovizive nuk është më vetëm një problem vendas. Serverë jashtë Shqipërisë, aplikacione IPTV, grupe në Telegram dhe kompani ndërkombëtare të teknologjisë janë tashmë pjesë e një ekosistemi shumë më kompleks të shpërndarjes së paligjshme të përmbajtjeve televizive.
IPTV-të ilegale po shndërrohen në një prej sfidave kryesore për tregun audioviziv shqiptar, ndërsa të dhënat e publikuara nga Autoriteti i Mediave Audiovizive tregojnë se infrastruktura që përdoret për pirateri po kalon gjithnjë e më shumë përtej kufijve kombëtarë.
Sipas AMA-s, gjatë vitit 2025 janë identifikuar dhe janë marrë masa për mbylljen e 10 serverëve që operonin në territorin e Shqipërisë, përmes të cilëve shpërndaheshin përmbajtje audiovizive pa të drejtat përkatëse të transmetimit.
Por gjurmët e infrastrukturës pirate kanë çuar edhe jashtë vendit.
Autoriteti raporton se janë identifikuar 4 serverë të tjerë në Rumani, Mbretërinë e Bashkuar dhe Francë. Për këto raste është bashkëpunuar me ofrues ndërkombëtarë të hostimit për të mundësuar bllokimin e tyre.
Telegram, një tjetër kanal i shpërndarjes
Monitorimi ka prekur edhe Telegram-in. Sipas AMA-s, janë evidentuar 11 grupe që përdoreshin për shitjen ose shpërndarjen e paligjshme të produkteve audiovizive.
Pas raportimeve të kryera pranë platformës, 7 prej këtyre grupeve janë mbyllur.
Kjo tregon një tjetër ndryshim të modelit të piraterisë: nuk bëhet fjalë vetëm për vendin ku transmetohet përmbajtja, por edhe për rrjetet sociale dhe platformat e komunikimit që përdoren për të reklamuar, shitur dhe shpërndarë aksesin në shërbimet IPTV ilegale.
AMA kontaktoi 20 kompani ndërkombëtare
Vetëm gjatë vitit 2026, AMA deklaron se ka kontaktuar 20 kompani ndërkombëtare në kuadër të hetimeve për shpërndarjen ilegale të kanaleve televizive.
Nga bilanci i publikuar, 13 kompani iu përgjigjën kërkesave të institucionit dhe 8 ndërmorën masa konkrete. Tre raste rezultonin ende në shqyrtim, ndërsa dy kompani kishin refuzuar të ndërhynin.
Në këtë kuadër janë raportuar edhe aplikacionet pirate “Kanali IM” dhe “ShikoShqip”, të cilat, sipas AMA-s, janë hequr nga disa prej platformave kryesore ku shpërndaheshin aplikacionet.
Pirateria po bëhet një problem teknologjik
Të dhënat tregojnë se lufta kundër piraterisë televizive po ndryshon rrënjësisht.
Nëse dikur ndërhyrja mund të përqendrohej te kontrolli i një operatori që ritransmetonte pa autorizim një kanal televiziv, sot zinxhiri mund të përfshijë një shërbim IPTV të shitur në Shqipëri, një server të vendosur në një shtet tjetër, një kompani ndërkombëtare hostimi, një aplikacion dhe një grup në Telegram që përdoret për të gjetur klientë.
Kjo e bën mbrojtjen e të drejtave televizive jo vetëm çështje të mbikëqyrjes së tregut shqiptar, por edhe të bashkëpunimit ndërkombëtar dhe kapaciteteve teknologjike për identifikimin e infrastrukturës pirate.
Për operatorët televizivë dhe platformat me pagesë, fenomeni prek drejtpërdrejt vlerën e të drejtave të transmetimit, veçanërisht për sportin, filmat, serialet dhe përmbajtjet premium.
