Një tjetër komedi shqiptare po përgatitet për ekranin e madh.
Ermal Mamaqi ka njoftuar se Mamaqi Production dhe Vita Production do të bashkëprodhojnë një film të ri shqiptar, duke e prezantuar projektin si një prej angazhimeve të tij më ambicioze kinematografike deri tani.
Përmes një postimi në rrjetet sociale, Mamaqi ka bërë të ditur se këtë herë nuk do të vijë vetëm, por në bashkëpunim me producenten Holta Dulaku, me të cilën, sipas tij, është diskutuar prej muajsh historia e filmit.
“Këtë radhë vijmë fuqishëm se kurrë. Sepse nuk vij vetëm”, shkruan Mamaqi, ndërsa më tej konfirmon bashkimin e dy kompanive të produksionit për realizimin e projektit.
Ai tregon se me Holta Dulakun kanë punuar prej muajsh mbi idenë dhe historinë e filmit, duke e cilësuar bashkëpunimin si një proces ku të dyja palët kanë të njëjtin seriozitet dhe të njëjtën dëshirë për produktin final.
Mamaqi falënderon gjithashtu Dulakun për besimin dhe investimin në kinemanë shqiptare, duke theksuar se prodhimi i filmave vendas kërkon ende guxim financiar dhe angazhim të madh.
“Për të investuar në film shqiptar duhet guxim. Pjesën tjetër do ta shihni në sallë”, shkruan ai.
Për momentin, detaje të tjera mbi kastin, regjinë, historinë apo datën e premierës nuk janë bërë publike. Megjithatë, postimi konfirmon se projekti tashmë ka hyrë në një fazë konkrete zhvillimi.
Bashkëpunimi mes Mamaqi Production dhe Vita Production është interesant edhe në aspektin e tregut, pasi bashkon dy struktura që kanë qenë aktive në produksionet komerciale shqiptare dhe në formatet e mëdha televizive e kinematografike.
Tani mbetet për t’u parë se çfarë historie do të sjellë ky projekt dhe nëse bashkimi Mamaqi–Dulaku do të synojë një tjetër sukses komercial në kinematë shqiptare.
