Sot është 60 vjetori i një ekrani që ka frymëzuar, argëtuar, informuar dhe ka bërë të ëndërrojë breza të tërë shqiptarësh jashtë dhe sidomos brenda kufijve…
RAI mbetet akoma një pikë reference për ata që punojnë në televizion dhe për të apasionuarit që ndjekin ekranin e vogël, edhe në 2014-ën.
60 vjet më parë, 3 janarin e 1954, filluan zyrtarisht transmetimet televizive të Rai-Radio Televisione Italiana, në një kanal të vetëm. Ishte Fulvia Colombo, zonjusha e mbrëmjes, që do të inaguronte transmetimet e kanalit që në ate kohë quhej Programi Kombëtar (Programma Nazionale), sot Rai 1. Po në të njëjtën ditë filloi transmetimin edicioni i parë i lajmeve, paraardhësi i Tg1 sot. Gjithashtu programi, E Diela Sportive (Domenica Sportiva) filloi transmetimin për herë të parë, në oren 23.15, me pamjet e ndeshjes Inter-Palermo: Domenica Sportiva, vazhdon të transmetohet edhe sot, duke u renditur si një nga programet më të ndjekura dhe të suksesshme të televizionit italian.
Për të festuar 60 vjetorin, Rai do të ofrojë pikërisht për këtë ditë një programacion special. Sonte në orën 21.10 në Rai 1, do të transmetohet programi “60 anni di tv” (60 vjet televizion), një speciale e programit historik Techetechete, program i pasur me skeçe, kënge dhe fragmente me disa nga personazhet italiane që kanë lënë gjurmë në historinë e televizionit italian, personazhe si Mike Bongiorno, Raffaella Carra, Maurizio Costanzo, e madhja Mina e shumë të tjerë, që pse jo kanë argëtuar edhe brezin shqiptar të asaj kohe. Më pas programi do të vazhdojë me Tv7, përgaitur nga redaksia e informacionit të Tg1 me lajmet dhe fytyrat e paharruara të ekranit në 60 vjet televizion.
RaiNews24 do të ofrojë një program të ngjeshur duke përshkruar historinë e televizionit, me kronika si dhe intervista me protagonistët më në zë që kanë qënë dhe janë pjesë e këtij gjigandi televiziv. Ndërsa në website-in zyrtar është hapur faqja “60-90”, e pasur me materiale të programeve më të mira në këto 60 vjet. Ditëlindja e Rai do të festohet edhe në kanalet e tjera, të cilat do të mundesojne për teleshikuesin program të zgjedhur.
Edhe Radio1 do të jetë prezent në festen e televizionit. Kanali all news do të dedikojë hapsire të gjerë në programacion, me speciale, intervista dhe të ftuar për të diskutar mbi 60 vitet e televezionit.
Për më shumë informacion rreth programeve dhe eventeve speciale që Rai ka përgatitur ju ftojmë të vizitoni website-in www.rai.tv
