Autoriteti i Mediave Audiovizive ka krijuar sot një precedent te rrezikshëm duke miratuar me 4 vota një vendim që ligji e sanksionon se duhet miratuar me shumice të cilësuar.
Nga sot gjithkush ngre dyshimin se çfarë ndodh me Komisionin Qendror të Zgjedhjeve kur i duhet të ndajë mandatet me 5 vota? A do të përdorë edhe ky institucion referencat për organet kolegjiale që përdori AMA sot? A do i ndaje mandatet me 4 vota? A rrezikohen kështu edhe vetë zgjedhjet në Shqipëri?
Për ish-drejtuesen e Autoritetit të Mediave Audiovizive Endira Bushati vendimi i sotëm është antiligjor e prokuroria duhet të hetojë për ketë çështje:
Këtu duhet hetim penal, duhet të dalin përgjegjësit e shpërdorimit të detyrës të kryetarit të Autoritetit të Mediave Audiovizve dhe të personave të tjerë përgjegjës. Duhet ta pranojmë që sot 3 licenca janë ne duart e një personi te vetëm, ky është monopol i pastër, organet përkatëse duhet ta hetojnë
Bushati shkon edhe me tej duke e cilësuar ketë një veprim mafioz:
Këtu është një kapje skandaloze, klienteliste, do të thoja duke përdorur një term mbase të rëndë por është i vetmi term qe mund ti përshtatet, mafioze, për interesa te një subjekti të caktuar e një institucioni shtetëror. Institucioni shtetëror, kryetari i këtij institucioni nuk ka reference ligjin, ka reference vetëm interesat e këtij operatori, ka shkelur ne mënyre flagrante kufizimet e pronësisë.
Edhe opozita është po kaq e ashpër ne reagimin kundër vendimit te Autoritetit te Mediave Audiovizive i cili sipas anëtarit te Komisionit te Medias Luciano Boçi çon ne monopolizimin e tregut:
Në ketë rast monopolizohet tërësisht tregu, madje një grup aksionaresh kane kapur rrjete frekuencash me shume edhe se sa Televizioni Publik, dhe kjo situate është alarmante e cenojnë rendë pikërisht atë qe AMA ka për detyre ta ruaje lirinë e medias, konkurrencën e barabarte dhe mosdiskriminimin.
Sipas Boçit, AMA nuk mund te përdorë asnjë reference tjetër ligjore përveç atyre qe janë hartuar e miratuar për median, prandaj ky vendim është një shkelje flagrante e ligjit:
Është ne shkelje te plote te ligjit për median dhe ne shkelje te plote te rregullores se dhënies për licencat. Referencat ligjore nuk besojnë se funksionojnë për organet kushtetuese, rregullorja dhe ligji e kane te qarte qe licencat numerike jepen me shumice te cilësuar.
Zyra e OSBE ne Tirane po ndjek me vëmendje procesin e dhënies se licencave kombëtare te transmetimeve audiovizive. Zyrtare te misionit i pohuan Vizion Plus, se pas vendimeve te fundit te AMA-s, si dhe shqetësimeve publike e zyrtare te ngritura nga subjektet ne gare, OSBE po monitoron me seriozitet situatën. Po ashtu, për këtë çështje po mbahet e informuar edhe përfaqësuesja për lirinë e medias ne zyrat qendrore te OSBE ne Vjene, Dunja Mijatovic. Pas mbledhjes se informacionit, OSBE pritet te dale me nje qëndrim mbi këtë çështje.