Zorro është personazhi i lindur nga romani Mallkimi i Capistrano (The Curse of Capistrano) shkruar nga Johnston McCulley në vitin 1919. Kalorësi heroik veshur me të zeza që fsheh identitetin e tij pas një maske dhe firmos çdo mision me shkronjën kapitale Z, ka qënë protagonist i librave, serialeve televizive dhe filmave. Për kënaqësinë e brezit të ri do të rikthehet në një serial të ri të animuar, prodhuar në CGI dhe HD, planifikuar për sezonin e ardhshëm televiziv.
Produksioni i ri i Cyber Group Studios, (fitues i Pulcinella Award si Studio më e mirë e animacionit në Cartoons on the Bay 2014) me qendër në Paris, në bashkëpunim me Blue Spirit Studios për France Télévisions dhe RaiFiction për Italinë, është i përberë nga 26 episode nga 22 minuta i projektuar për fëmijët e moshës 6 deri 12 vjeç.
Zorro do të vijë për herë të parë në tv në versionin CGI. Filmi i animuar rrëfen aventurat e Don Diegos adoleshent që lufton për drejtësi kundër tiranëve të shumtë dhe të paskrupullt.
Edhe këtë herë, siç është bërë zakon kur është fjala për Zorro, heroi tallet me kundërshtarët e tij edhe pse të liqtë bëjnë komplot dhe gjithçka kundër tij. Fisniku adoleshent Diego lufton në emër të të varfërve kundër tiranisë e guvernatorëve të ndryshëm dhe gjithmonë do të perdor shpatën dhe truket dinake për të zgjidhur situatën.
Protagonisti këtë herë do të ketë përkrah një vajzë të zgjuar dhe të guximshme, Ines, motra binjake e cila është në dijeni të identitetit të tij të dyfishtë. Nuk do të mungojnë Bernardo, shoku i tij i besnik, dhe Togeri bullafiq Pedro Garcia (shok i Diegos) tek i cili Zorro do të firmos me emrin e tij, Z-ja e madhe e bërë me tre gërvishtje të shpatës.
