RTSH po përgatit një prej paketave më ambicioze të serialeve ndërkombëtare të viteve të fundit. Në spotin e sezonit të ri, transmetuesi publik ka paralajmëruar pesë produksione, që shkojnë nga romanca moderne turke te superprodhimet historike europiane dhe historia e një prej familjeve mbretërore më të njohura të kontinentit.
Dhe pas emrave të promovuar nga RTSH fshihen disa projekte që kanë pasur tashmë një rrugëtim të rëndësishëm ndërkombëtar.
Hande Erçel dhe Barış Arduç vijnë me “Aşkı Hatırla”
Dy prej emrave të vendosur në qendër të fushatës së RTSH-së, Hande Erçel dhe Barış Arduç, janë protagonistët e “Aşkı Hatırla” (“Remember Love”), produksion i O3 Medya i realizuar për Disney+.
Seriali romantik prej 8 episodesh ndjek Güneş, një editore dhe figurë e njohur në rrjetet sociale, dhe Deniz, një arkitekt i famshëm. Të dy kanë dalë nga marrëdhënie të përfunduara dhe një mesazh i papritur i çon drejt një udhëtimi në Kapadokia, ku fillojnë të rizbulojnë jo vetëm të kaluarën, por edhe raportin mes tyre.
Kjo do të thotë se RTSH po merr një titull të konceptuar fillimisht për tregun e streaming-ut, me dy aktorë që kanë një publik të konsiderueshëm edhe jashtë Turqisë.
Onur Tuna me “Aynadaki Yabancı”
Një tjetër emër i promovuar është Onur Tuna, i njohur për publikun e serialeve turke nga produksione si “Mucize Doktor” dhe “Yasak Elma”.
Projekti i tij është “Aynadaki Yabancı” – “I huaji në pasqyrë”, një dramë e MF Yapım e ndërtuar rreth një historie shumë më të errët familjare.
Në qendër është një grua që përpiqet të rifitojë vajzën e saj dhe të rindërtojë jetën pasi marrëdhënia me bashkëshortin shndërrohet në një burg emocional. Onur Tuna interpreton Emirhanin, ndërsa produksioni ndërthur dramën familjare, romancën dhe suspense-in.
Kjo e vendos titullin në një tjetër territor nga romanca e “Aşkı Hatırla”, duke i dhënë paketës turke të RTSH-së më shumë diversitet.
Can Yaman vjen si luftëtar në “El Turco”
Por një nga titujt me potencialin më të madh për të tërhequr vëmendjen e publikut është padyshim “El Turco”, me Can Yaman.
Këtë herë aktori largohet nga imazhi klasik i komedive romantike turke dhe kalon në një produksion historik me aksion dhe aventurë.
Yaman interpreton Hasan Balaban, një ushtar të Perandorisë Osmane që plagoset në betejë dhe përfundon në Moena, në veri të Italisë. Pasi sheh mënyrën se si banorët shtypen nga zotër feudalë, ai vendos të qëndrojë dhe të luftojë për ta. Në krah të tij luajnë Greta Ferro dhe Will Kemp.
Seriali kombinon histori, aksion, aventurë dhe romancë dhe ka nisur tashmë të udhëtojë në tregje të ndryshme ndërkombëtare; vetëm këtë verë Telemundo e transmetoi në SHBA për publikun hispanik.
Pra, për RTSH-në nuk bëhet fjalë për një tjetër serial tradicional turk me dhjetëra apo qindra episode, por për një projekt të ndërtuar si miniserial ndërkombëtar.
“Hunyadi – Ngritja e një Heroi”, produksioni gjigant historik
Nëse “El Turco” sjell aventurën, “Hunyadi – Rise of the Raven” është titulli që e çon paketën e RTSH-së në territorin e epikës historike.
Është një miniserial prej 10 episodesh, bazuar në romanet historike bestseller të Mór Bán, që tregon ngritjen e János Hunyadit nga origjina relativisht modeste deri në shndërrimin e tij në një prej figurave ushtarake dhe politike më të rëndësishme të Europës Qendrore të shekullit XV.
Historia kulmon me rrethimin e Beogradit më 1456, ku ushtria e drejtuar nga Hunyadi përballet me forcat osmane të Mehmetit II.
Edhe kasti e tregon përmasën europiane të projektit.
Në serial shfaqen aktorë nga vende të ndryshme, ndërsa ndër emrat ndërkombëtarë spikasin Giancarlo Giannini, në rolin e Papa Eugjenit IV, dhe Rade Šerbedžija. Hunyadin e interpreton Gellért Kádár L.
Produksioni është realizuar në partneritet me Beta Film dhe National Film Institute of Hungary, ndërsa mes regjisorëve është edhe Robert Dornhelm, i nominuar më parë për Oscar.
Për publikun shqiptar, seriali mund të ketë një interes shtesë për shkak të periudhës historike që trajton: është pikërisht shekulli XV dhe përplasja europiano-osmane, pra konteksti historik në të cilin zhvillohet edhe epoka e Gjergj Kastriotit Skënderbeut.
“Máxima”, nga CANNESERIES në ekranin e RTSH-së
Titulli i pestë është krejt ndryshe.
“Máxima” tregon historinë e Máxima Zorreguieta-s, nga jeta e saj në Argjentinë dhe New York deri te njohja me princin Willem-Alexander dhe rruga drejt familjes mbretërore holandeze.
Sezoni i parë përbëhet nga 6 episode prej rreth 50 minutash dhe nis në vitin 1999, kur Máxima dhe Willem-Alexander takohen në Sevilje.
Në rolin e Máxima-s është aktorja argjentinase Delfina Chaves, ndërsa Willem-Alexander interpretohet nga Martijn Lakemeier.
Por seriali nuk trajton vetëm romancën.
Historia hyn edhe në një prej kapitujve më të diskutuar të jetës së Máxima-s: polemikat që shpërthyen në Holandë rreth rolit të babait të saj gjatë regjimit ushtarak të Jorge Rafael Videla-s në Argjentinë.
Produksioni pati premierën botërore në CANNESERIES, ndërsa suksesi bëri që sezoni i dytë të porositej që përpara transmetimit të sezonit të parë në Videoland.
Një strategji ndryshe për RTSH
Duke parë më nga afër pesë titujt, bëhet më e qartë edhe strategjia e sezonit.
RTSH nuk po mbështetet vetëm te formula klasike e serialeve të gjata turke.
Në të njëjtën paketë kemi Disney+, produksione europiane premium, një serial të prezantuar në CANNESERIES, dramë historike me kast ndërkombëtar dhe një miniserial me Can Yaman të shpërndarë në tregje të ndryshme botërore.
Pra, duket se RTSH kërkon të krijojë një fashë serialesh më pranë logjikës së platformave streaming: histori më kompakte, produksion vizual më i lartë dhe tituj që kanë potencial të funksionojnë përtej tregut ku janë prodhuar.
Dhe kjo e bën edhe më interesante frazën me të cilën RTSH po e mbyll fushatën:
“Ky është vetëm fillimi… Historitë sapo kanë nisur.”
