Tiranë – Delegacioni i Bashkimit Evropian në Shqipëri ka reaguar pas veprimeve të policisë së shtetit dhe forcave ushtarake ndaj Focus Media Group, kompania që administron televizionin News24, Radio Shqiptare dhe portalin BalkanWeb.
Prej katër ditësh, sinjali i News24 është ndërprerë, ndërsa ambientet e punës janë bastisur, pajisjet elektronike dhe dosjet e gazetarëve janë sekuestruar, duke shkaktuar një krizë të paprecedentë në historinë e medias shqiptare.
Në një mesazh të publikuar në platformën “X” (ish-Twitter), Delegacioni i BE-së në Tiranë nënvizon se çdo mosmarrëveshje duhet të zgjidhet duke respektuar ligjin dhe procedurat e rregullta ligjore, duke paralajmëruar që asnjë veprim nuk duhet të pengojë punën e gazetarëve apo të cënojë konfidencialitetin e burimeve të tyre.
> “Mosmarrëveshjet midis të gjitha palëve të përfshira duhet të zgjidhen duke respektuar plotësisht ligjshmërinë dhe procedurat e rregullta ligjore. Është e rëndësishme që çdo veprim i ndërmarrë të mos cenojë mundësinë e gazetarëve për të ushtruar lirinë e tyre në përcjelljen e informacionit dhe për të ruajtur konfidencialitetin e burimeve të tyre. Këto janë aspekte thelbësore të lirisë dhe pluralizmit të medias, kritike për garantimin e shtetit të së drejtës”, – thuhet në deklaratë.
Ky reagim vjen në një moment kur ngjarja ka ngritur shqetësim të madh në opinionin publik dhe në organizatat e mbrojtjes së lirisë së medias, të cilat paralajmërojnë se ndërhyrje të tilla rrezikojnë jo vetëm pluralizmin mediatik, por edhe standardet demokratike në vend.
Sipas burimeve pranë kompanisë, mbyllja e sinjalit dhe sekuestrimi i pajisjeve nuk kanë ndodhur pas një vendimi përfundimtar gjyqësor, por në bazë të një urdhri administrativ që po kundërshtohet ligjërisht.
Çështja po ndiqet nga afër nga partnerët ndërkombëtarë dhe pritet të jetë pjesë e diskutimeve në raportet e ardhshme të Komisionit Evropian mbi progresin e Shqipërisë në fushën e lirisë së medias dhe sundimit të ligjit.
