Gazetari i njohur Bledi Strakosha nuk do të jetë më pjesë e Televizionit Publik Shqiptar (RTSH), ku ai ka punuar për shumë vite. Strakosha ka ndarë këtë lajm përmes një postimi në rrjetet sociale, duke sqaruar arsyet e largimit të tij dhe duke shprehur kritika ndaj institucionit të medias ku ka punuar për një kohë të gjatë.
Ai thekson se ka punuar në fushën e medias për 32 vite dhe përshkruan ndryshimet që ka përjetuar gjatë karrierës së tij, përfshirë ndryshimet në tregun e medias dhe shijet e audiencës. Strakosha gjithashtu përmend lidhjen dhe afërsinë shpirtërore që ka ndier ndaj RTSH, ku ai u formua profesionalisht që nga fillimi i viteve ’90.
Në postimin e tij, ai gjithashtu falënderon të gjithë ata që e kanë ndjekur dhe mbështetur gjatë viteve dhe përmend kontributin e personaliteteve të ndryshme të jetës shqiptare që kanë qenë të ftuar në emisionet e tij. Strakosha shpreh dëshirën që një ditë RTSH të ketë një fat mesatar dhe premton se do të vazhdojë të jetë aktiv në fushën e medias, duke shpresuar të takohet me audiencën së shpejti në një platformë tjetër.
‘Tetë vitet e fundit në RTSH për mua u mbyllën. Asgjë e re dhe asgjë tronditëse për dikë që prej 32 vitesh punon në media.
Me lëvizjet e tregut, me ndryshimin e shijeve të audiencës e ndoshta edhe me tekat e drejtuesve a me të kujt u gjendet pranë në zyrë a gjetkë në çaste të caktuara të ditës e të natës, jemi mësuar dhe nuk kapemi të papërgatitur.
I vetmi emocion (i kuptueshëm kësaj radhe) vjen nga lidhja dhe afërsia shpirtërore imja me këtë institucion ku kam hyrë që fëmijë, ku kam mësuar ABC-në e profesionit, ku jam formuar nga profesionistë të televizionit e të drejtimit të mediave. Që nga fillimi i viteve ‘90-të kur nisa punën në RTSH, kam parë të kalojnë shumë emra të njohur të televizionit, siç kam parë të vijnë e të ikin drejtues dhe emërues drejtuesish: secili me shkallën e vet të përkushtimit, ndershmërisë, aftësisë, zgjuarsisë, qytetërimit.
Për vullnete, të cilat nuk është ky rasti t’i analizoj, RTSH ka shumë vite që ndodhet në gjendjen që njihet, por ajo që mund të them është se në këtë institucion ka ekzistuar një lloj pakti i pashprehur ku profesionistët janë trajtuar të paktën si trajton qytetari shtëpinë me qira apo fshatari hurmën e fqinjit kur i bie në oborr. Për sa po ndodh aktualisht në RTSH nuk bëj asnjë koment. E vetmja frazë që mund të shpreh është se ëndërroj të vijë dita që RTSH të ketë një fat mesatar. Të paktën! Së fundmi, gjej rastin të falënderoj nga zemra të gjithë ju që në këto tetë vite keni zgjedhur të më ndiqni apo edhe ju që në ekranin e RTSH-së e që në programet e mia keni ndalur rastësisht.
Shumë falënderime tërë atyre personaliteteve të jetës shqiptare, të cilët kanë pranuar të jenë të ftuar në emisionet e mia, qoftë edhe kur e kanë bërë për miqësi apo si “qokë” personale.
Bashkë, herët a vonë do të shihemi diku. Me respekt e mirënjohje për të gjithë ju!’– shkruan gazetari.
