Gjysma e të gjithë të rriturve në Britani kanë marrë të paktën një dozë vaksine, tha të shtunën ministri britanik i shëndetësisë, Matt Hancock.
Britania arriti këtë shifër pasi administroi një rekord prej 660,276 doza një ditë më parë, tha Hancock. Kryeministri Boris Johnson, i cili bëri vaksinimin e AstraZeneca të Premten, shkroi në Twitter “Le të vazhdojmë”.
Izraeli është lider në vaksinimin e popullsisë së tij, i ndjekur nga Emiratet e Bashkuara Arabe, Kili, më pas Mbretëria e Bashkuar, dhe investitorët po shikojnë nga afër për të parë se cilat ekonomi tregojnë shenjat e para të rimëkëmbjes.
Sipas Reuters qeveria e Britanisë ka thënë se po synon të japë të paktën një dozë për të gjithë personat mbi 50 vjeç nga mesi i Prillit dhe për çdo të rritur deri në fund të Korrikut. Gjatë kësaj periudhe, ajo ka plane për të lehtësuar kufizimet e bllokimit, me dyqanet, pub-et dhe restorantet që po përgatiten të rihapen muajin tjetër.“Vaksina është një histori suksesi kombëtar dhe mënyra jonë për të dalë nga kjo pandemi”,- tha Hancock.
Bashkimi Evropian, ku ka shqetësime në rritje për një valë tjetër infektimesh, po bën përpjekje për të marrë vaksinat përsëri në rrugën e duhur pasi të paktën 13 vende pezulluan përkohësisht përdorimin e AstraZeneca javën e kaluar për shkak të shqetësimeve të sigurisë.
