Amici”, një produksion artistik në Itali që i ka mirëpritur prej vitesh shqiptarët e talentuar, tani do të mbërrijë në Shqipëri. Në hapje të sezonit të ri të ‘Në kurthin e Piter Pan’ moderatorja tek sa bëri një homazh për humbjen e personalitetit të famshëm të televizionit italian Maurizio Costanzo, zbuloi kalimthi që së shpejti do të sillte një format të njohur të Mediaset.
Por sikur të mos mjaftonte kjo deklaratë e zbuluar në mënyrë elegante jo pa qëllim, ra në shënjestrën e mediave për të zbuluar më shumë se cili do të ishte formati që Vejsiu do të sillte në Shqipëri? Javë më parë Alketa vizitoi studiot e Mediaset duke ndarë me ndjekësit e saj edhe disa foto por asnjë detaj më shumë rreth këtij takimi pune.
Sipas burimeve të Anabel moderatorja ka arritur të blejë patentën e Amici të Maria de Filippi dhe produksioni ka nisur nga puna për ndërtimin e të gjitha strukturave që e bëjnë Amici-n një akademi. Për momentin, është e paqartë se kur do të fillojë talent show.
Vetë Vejsiu ka konfirmuar lajmin duke ripostuar në story.
I njohur fillimisht si “Saranno famosi”, “Amici” është talent show më i gjatë në televizionin italian. I konceptuar dhe drejtuar nga Maria De Filippi, “Amici” u transmetua për herë të parë në vitin 2001. “Amici” është një shkollë, në formën e akademisë, për të gjithë të rinjtë që aspirojnë të bëhen balerinë profesionistë, këngëtarë, muzikantë etj. Konkurrentët ndjekin mësime të lëndëve të ndryshme, filmohen nga kamerat dhe qëndrojnë në një godinë të posaçme.
Formati ka qenë gjithmonë mikpritës për talentet shqiptare, ku përmendim këtu Kledi Kadiun i cili u bë pjesë e “Amici” si balerin profesionist në vitin 2001 dhe më pas kaloi si mësues baleti; balerina Anbeta Toromani konkurroi në program në sezonin 2002-2003 dhe u rendit e dyta në finale si edhe vijoi më vonë të ishte pjesë e trupës së balerinëve profesionistë; në sezonin 2003-2004 balerini shqiptar Leon Cino u shpall fitues; një vit më vonë, balerini Klajdi Selimi u rendit i treti; Klaudia Pepa preku finalen në sezonin 2014-2015; Ilir Shaqiri ka marrë pjesë në “Amici” si balerin profesionist; këngëtarët Ermal Meta dhe Anna Oxa (Ana Hoxha) kanë qenë pjesë e paneleve të jurisë.
