Triumfi i këngëtares Elhaida Dani në edicionin e 53-të të Festivalit të Këngës nuk ka kaluar pa u vën re. Absolutisht komentet nga publiku vazhdojnë të jenë të shumta edhe pas tetë ditësh nga triumfi. Ky triumf i jep të drejtë ekskluzive këngëtares shkodrane për të përfaqësuar vendin tonë në Festivalin Europian të Këngës, Eurovision 2015.
Menjëherë pasi mësuam se kush do të na përfaqësoj për edicionin e 60-të të Eurovision, komentet në rrjetet sociale kanë qenë të shumta. Gjatë një monitorimi që IMAlbania ka bërë në këto rrjete shoqërore rezultoi se ka shumë shqiptar që nuk janë dakord me përfaqësimin e këtij viti. Theksojmë që përgëzohet maksimalisht zëri i këngëtares por jo kënga. Kënga me titull “Diell” është ngarkuar në kanalin zyrtar të Eurovision në You Tube dhe komentet nga fansat europian të festivalit nuk kanë munguar. Ka vlerësime shumë pozitive që parashikojnë daljen absolute të saj në finale. Patjetër që ka edhe komente negative nga të huajt, kryesisht nga vendet sllave, por ato që bien shumë në sy janë komentet e shqiptarëve nëpër faqet e Eurovision. Aspak optimiste dhe shumë kundër rezultatit, në momentin kur kënga vlerësohet nga më shumë se 70% e komentuesve nga Europa.
Kujtojmë që në vitin 2012 Shqipëria përfaqësohej nga këngëtarja Rona Nishliu, e cila vetëm sa nuk u kryqëzua nga shqiptarët, deri në momentin e suksesit me vendin e pestë. Menjëherë më vonë, ne shqiptarët, për atë që e kishim sharë për më shumë se pesë muaj mbushëm rrjetet sociale me fjalët: “Proud Rona”. A nuk është e çuditshme? Këtë vit ne përfaqësohemi nga Elhaida Dani, një këngëtare e afirmuar ndërkombtarisht dhe me një këngë që është vlerësuar nga Europa. Është momenti i mbështetjes për këtë këngë. Sepse është kënga jonë dhe nuk mund të rikthehet më mbrapa ky rezultat. Ne të IMAlbania shprehim mbështetjen më të fuqishme të përfaqësimit në Eurovision të këtij viti. I urojmë Elhaidës një përgatitje dhe përfaqësim dinjitoz, dhe pse jo edhe më një tiumf në Vjenë.
IMA / S. Dema
