Pas mbylljes së formatit investigativ “Alarm” drejtuar nga Armir Shkurti, që u shoqëruar me polemika dhe peticione për mos mbylljen e tij, Ora News po përgatitet për fillimin e një tjetër formati që do të ndjekë gjurmët e paraardhësit. “Të Paekspozuarit” është titulli i formatit televiziv me fokus gazetarinë investigative. Qëllimi i emisionit është jo vetëm t’u hedhë një vështrim ngjarjeve shqetësuese por të analizojë thelbin e tyre duke realizuar ndoshta për herë të parë në Shqipëri ekspozimin rrënjësor të korrupsionit, injorancës, banalitetit dhe keq-qeverisjes, elementë të cilët e kanë shoqëruar vendin tonë gjatë gjithë këtyre viteve të vështira të tranzicionit.
Por sa bindës do të jetë ky program i ri për teleshikuesin duke pasur parasysh se “Alarm” u mbyll, sipas pretendimeve të ideatorit dhe drejtuesit Armir Shkurti, nga dora e sistemit qeverisës të cilit po i prekeshin interesat në zbulimin e të palarave? E vështirë të pashikohet një sukses por kjo është për t’u parë së shpejti me fillimin e transmetimit të formatit të ri.
