“Italia, më shumë se Shqipëria ka makaronat”. Nuk është një deklaratë që e thotë kushdo, por një deklaratë e një kantautori më modest që mund të keni njohur. Ermal Meta ishte mbrëmjen e sotme “Në kurthin e Piter Panit” për të ndarë me publikun shqiptar atë pjesë që i mungon më shumë në Itali: “Këtu kam një pjesë të zemrës”, – thotë ai po aq modestisht sa përmend edhe të gjitha arritjet e veta.
Përballë fëmijëve, Ermali nuk shpëtoi edhe nga pyetjet për Eurovisionin dhe sidomos për vlerësimin e Shqipërisë nga juria italiane – çudia më e madhe jo vetëm për shqiptarët, por edhe për një pjesë të mirë të atyre që e vlerësuan dhe e duartrokitën Gent Bushpepën.
Kur fëmijët e pyetën a u mërzit që Italia nuk i dha asnjë pikë Shqipërisë, Ermali tha se jo vetëm u çudit, por u zhgënjye më shumë: “U zhgënjeva shumë, madje bëra edhe sherr me nja dy që ishin aty…” – tha Ermali duke e vijuar edhe më tutje bindjen e tij. Për të, në Eurosong kishte shumë këngë të forta, por këngëtari që këndoi më mirë se të gjithë, ishte Eugent Bushpepa.
Nuk e lë kurrë pas modestinë, por kur flet një artist si ai, me siguri ka një të vërtetë që duhet besuar brenda.
