Ndërsa për të dashuruarit Shën Valentini është një ditë për të kujtuar ndjesinë më të bukur në botë, për Top Albania Radio është një ditë akoma më e veçantë.
13 Shkurti është caktuar si dita ndërkombëtare e Radios sepse këtë datë të vitit 1946 Kombet e Bashkuara kanë themeluar Radion zyrtare.
Një datë më pas 14 shkurt në ditën e shënuar të dashurisë, lindi Top Albania Radio.
Ishte dhe një periudhë kur Shqipëria sa kishte nisur të mëkëmbej nga troshitja që i bëri vetes më 97-ën. Sakaq ishte dhe fund-dimri. Pranvera që po afrohej nuk ishte ajo e një viti më parë, por trishtimi ndër njerëz ishte akoma prezent.
Në këtë ditë, 14 shkurt 1998, në frekuencën tashmë të njohur nga të gjithë, 100 mgh/fm, dëgjohet “Top Albania Radio”.
Ky medium radiofonik tashmë është shndërruar në radion më të suksesshme në vend, me muzikën më të zgjedhur shqiptare dhe të huaj dhe me edicionet informative të cilat transmetohen çdo 60 minuta me lajmet më të fundit nga vendi dhe bota, por dhe me një larmi programesh kulturore e sportive.
Top Albania Radio është një ndër radiot kombëtare në Shqipëri. Ajo u themelua me iniciativën e të ndjerit, Dritan Hoxha.
