“Ethet e së premtes” dikur kanë qenë një prej emisioneve më të shikuara në Kosovë e në Shqipëri.
Emocionet e programit përcilleshin tek publiku me anë të këngëve, talenteve të reja por edhe atyre që me vetëbesim mendonin se kishin një vokal që premtonte.
Për herë të parë “Ethet e së premtes” nisën të transmetoheshin në nëntor të vitit 2002, në drejtimin e Adi Krastës.
Juria ishte e përbërë nga profesionalistë të muzikës si: Shpëtim Saraçi, Alfred Kaçinari, Zhani Ciko dhe Zerina Kuke. Disa nga emrat që morën pjesë në edicionin e parë kanë qenë: Elvana Gjata, Rosela Gjylbegu, Klajdi Musabelliu apo Anjeza Shahini.
Pas kësaj fitoreje, Anjeza Shahini konkurroi në Festivalin e RTSH-së, në vitin 2003 ku u shpall fituese dhe përfaqësoi Shqipërinë në “Eurovizion 2004”, duke u radhitur e 7-ta, që herën e parë kur Shqipëria mori pjesë në Festivalin Evropian.
Edicioni pasardhës i “Ethet e së premtes mbrëma” u mbajt sërish në vitin 2004, ku fitues u shpall Luis Ejlli, – i cili më pas përfaqësoi edhe Shqipërinë në Eurovision. Atë vit pjesëmarrës ishin edhe Samanta Karavella, Teuta Kurti, Vesa Luma, Rona Nishliu dhe Kamela Islamaj.
Edicioni i tretë solli në skenë emra si: Greta Koçi, Linda Halimi, Hersi Matmuja, Besart Halimi, Mateus Frroku apo Flaka Krelani. Në vitin 2005, u shpall fitues, Erti Hizmo.
Në vitin 2008, u mbajt dhe edicioni i fundit i “Ethet e së premtes mbrëma”. Listën e kryesuan Xhensila Myrtezaj, e cila arriti të futej në Top 10-in e më të mirëve të edicionit të katërt. Dorina Garuci, Fatlum Zeka, Rezarta Smaja, Dorina Xërxa apo Kejsi Tola, ishin disa nga emrat tjerë që morën pjesë atë vit.
Nga ky konkurs ka edhe artistë që nuk u futën në Top 10-in e finalistëve, por që sot janë të pëlqyer nga publiku, si Elhaida Dani, Hana Cakuli, Ronela Hajati apo Olta Boka.
