Padyshim që “Përputhen” është një nga emisionet më të ndjekur në ekranet shqiptare, po ashtu shumë i komentuar edhe në rrjetet sociale. Pak ditë më parë u bë me dije me anë të një video-je ku shfaqeshin protagonistët kryesorë të tij, se duke nisur nga 3 janari, do të nisë “Përputhen Prime”, një version i ri i programit që do të jetë “prime time” çdo të dielë, dhe do t’i shtohet formatit aktual që transmetohet çdo ditë.
Burime për “News31” bëjnë me dije se opinioniste e “Përputhen Prime” do të jetë Fatma Haxhialiu, e cila do t’i bashkohet pjesëmarrësve të emisionit dhe moderatores Bora Zemani në studio. Në fakt në Instagram-in e Fatmës, nisur edhe nga fakti që ajo i komenton shpesh në mënyrën e saj ngjarjet që ndodhin “Përputhen”, shumë ndjekës e kanë pyetur se përse nuk është në karrigen e opinionistes.
Mesa duket kërkesa e ndjekësve, që njëkohësisht janë edhe publik i programit, është marrë parasysh dhe është gjetur kjo zgjidhje, me Fatmën që do të luajë rolin e asaj që do të komentojë gjithçka që ndodh mes personazheve, tashmë shumë të njohur. Ndër të tjera, në “Përputhen Prime” mësohet se do të shfaqen video të patransmetuara gjatë javës së takimeve mes protagonistëve dhe do të zbulohen sekrete të tyre apo edhe detaje nga marrëdhëniet që po krijohen.
Duke njohur Fatmën, që nuk i trembet asnjë debati dhe që ”thumbin” e ka gjithmonë me vete, presim të shohim një spektakël të vërtetë.
