Televizioni publik nuk do të transmetojë materiale të gatshme të partive politike gjatë edicioneve të lajmeve. Me nisjen e fushatës zgjedhore, RTSH njofton se nuk do të pranojë asnjë material të gatshëm të partive, cilatdo qofshin ato, por do ta mbulojë aktivitetin politik me gazetarët e vet.
Vendimi bëhet i ditur nëpërmjet një shkrese të firmosur nga drejtori i Përgjithshëm i RTSH-së, Thoma Gëllçi, për të cilën janë vënë në dijeni krerët e të gjitha partive politike që garojnë për zgjedhjet e 25 qershorit.
Kjo masë ka për qëllim shmangien e publikimit të materialeve propagandistike që partitë përgatisin nëpërmjet zyrave të tyre të shtypit. RTSH konsideron se transmetime të tilla nëpër emisionet e lajmeve bëhen duke shkelur rëndë pavarësinë e tyre por edhe ligjin, i cili e përcakton qartë se duhet bërë një ndarje e qartë e reklamës me informacionin dhe se ndalohet reklama e fshehtë.
Në njoftimin e shpërndarë nga RTSH-ja thuhet se ky vendim është hapi i duhur që duhet ndjekur edhe nga televizionet e tjera në vend.
Njoftimi i RTSH-së
Radio Televizioni Shqiptar (RTSH) nuk do të pranojë, për emisionet e veta të lajmeve, materiale të gatshme të partive politike pjesëmarrëse në zgjedhjet e afërme elektorale, por do ta mbulojë fushatën zgjedhore vetëm me gazetarët e vet.
RTSH përmes një shkrese të firmosur nga drejtori i Përgjithshëm, Thoma Gëllçi, njoftohen kryetarët e partive pjesëmarrëse në zgjdhje se pasqyrimi i aktiviteteve të partive politike do të bëhet në mënyrë të pavarur dhe profesionale nga vetë gazetarët dhe operatorët e saj. Kjo, sipas RTSH, do t’i shërbejë ruajtjes së profesionalizmit dhe informimit të paanshëm të publikut.
Dihet se partitë politike shqiptare dhe sidomos partitë e mëdha kanë ngritur zyra të fuqishme të shtypit dhe propagandas, të cilat të mirëpajisura dhe të mirëpaguara përgatisin material propagandistike të gatshme të cilat shpërndahen nëpër televizionet e vendit. Transmetime të tilla nëpër emisionet e lajmeve bëhen duke shkelur rëndë pavarësinë e tyre por edhe ligjin, i cili e përcakton qartë se duhet bërë një ndarje e qartë e reklamës me informacionin dhe se ndalohet reklama e fshehtë.
Ky vendim nuk përfshin kohën e përcaktuar me ligj që jepet falas për propogandën e partive politike,nga televizioni publik dhe tani me ndryshimet e fundit edhe nga televizionet private , por kjo do të jetë e treguar qartë dhe e ndarë nga emisionet informative apo nga emisionet e tjera radiotelevizive.
Kohët e fundit Këshilli Drejtues i Radiotelevizionit Shqiptar miratoi, për herë të parë, parimet e veta editoriale ku është përcaktuar në mënyrë konkrete se si duhet të sillet gazetari i RTSH-së gjatë fushatave elektorale. Sipas Parimeve Edioriale , “gjatë fushatës zgjedhore, përfaqësuesve të partive politike ose kandidatëve që garojnë nuk u lejohet të paraqiten në emisione të tjera të RTSH-së, me përjashtim të rasteve te përcaktuara në Kodin Zgjedhor për kohën falas të propagandës së Partive Politike. Kur pasqyrohen aktivitetet e përfaqësuesve të partive politike dhe kandidatëve që mbajnë poste qeveritare apo publike, RTSH duhet të bëjë dallimin e qartë midis funksioneve të tyre zyrtare dhe veprimtarisë zgjedhore.
Deri më tani RTSH ka bërë disa trainime të gazetarëve të saj për pasqyrimin e fushatës zgjedhore.
Ditët e fundit, në RTSH janë zhvilluar disa seanca trainimi nga pedagogu i Akademisë së Eurovizionit dhe ish-gazetari i BBC, Jonathan Stoneman, pikërisht për fushatën zgjedhore që jemi në prag.
Duhet thënë se vendimi i RTSH-së për të mos pranuar materialet e gatshme të partive politike, por ta ndjekë këtë me gazetarët e vet, është një hap i duhur që duhet të ndiqet edhe nga televizionet dhe radiot e tjera private, të cilat shpesh herë kthehen në zëdhënëse të zyrave të shtypit të partive te ndryshme.
