Përpara se të flasësh për prezantuesin/en, a mund të biem të gjithë dakord që kjo është hera e fundit që flasim për Big Brother VIP? Nuk të kuptova. Ç’do të thuash?
Dua të them që flitet që prej 2017-s që do të fillojë Big Brother Vip. Në 2018-n po ashtu u përfolën prezantuesit (Luana, Ledioni, Dojna, Oriela) etj. etj. se kush i mban mend. Pastaj u anulua, pastaj u rikthye në 2019-n, pastaj e përforcoi edhe Arbana faktin që s’ka gjasa të rikthehet në 2020-n. Dhe një vit më vonë, sërish flitet për Big Brother VIP. Pra, ti po thua që nuk e beson nisjen e këtij emisioni?
Jo, po them që aq herë sa është përfolur, mendoj se do ishte mirë të niste…më në fund. Sidoqoftë, kalojmë te prezantuesi/ja. Kush do të jetë? Për momentin, nuk ka ende një emër konkret. Burime për Anabel bëjnë me dije se ka nisur një garë në distancë mes disa figurave të njohura televizive në Top Channel.
Për Big Brother VIP?! Po, sigurisht. Ky program është i testuar prej kohësh dhe e ka shikueshmërinë të garantuar. Të mos flasim për popullaritetin që e favorizon shumë edhe epoka e internetit.
Me fjalë të tjera, kush nuk do donte ta prezantonte. Ekzakt!
Po cilat emra përfliten, përpos atyre që na shkon mendja të gjithëve? Tani, nuk di të të jap një përgjigje, por mund të përdorim logjikën. Shumë emra kanë fituar popullaritet së fundmi në Top Channel, ndaj s’kemi pse çuditemi nëse do të jenë prezantuesit e ardhshëm.
Më thuaj disa. Fjoralba Ponari ka patur një ngjitje të shpejtë, dhe të merituar, në Top Channel, ku së fundmi iu besua prezantimi i “Portokallisë”. Pra, një “rrezik” i ri.
Dakord jam. Tjetër? Dojna Mema njihet për energjinë që ka në spektakle primetime, si për shembull “Voice of Albania”. Dojna përfundoi prezantimin e spektaklit të kërcimit në “E diell”, pra është e lirë për momentin.
Dakord jam edhe për Dojnën. Më pëlqejnë të dyja. Kemi edhe Bora Zemanin. Nuk ka fort gjasa të ndodhë, sepse autorja e “Për’Puthen”, Olsa Muhameti, u shpreh se “Për’Puthen” do të vazhdojë. Por edhe nëse do të ndodhte, Bora tregoi se e menaxhoi shkëlqyeshëm programin dhe ka fituar zemrat e njerëzve dhe iu është bërë si e shtëpisë.
S’kam kundërshtime. Por siç the më sipër, ka të tjerë emra që të vijnë në mendje fillimisht.
Arbana dhe Luana. Pikërisht!
Mendon se është një garë e fortë? Padyshim. Dikur, “Big Brother” ishte ekskluzivitet i Arbanës, e cila më pas u largua dhe moderimi i kaloi Ledion Liços që e menaxhoi me shumë sukses. Ndonëse Ledioni po merret më shumë me projekte në prapaskenë, sidomos në Digitalb, Arbana nuk shihet si pretendentja e vetme për spektaklin.
Sepse është edhe Luana. Burime për Anabel.al bëjnë me dije se Arbana është në përfundim të ciklit të “Dua të të bëj të lumtur”, ndërkohë që Luana nuk ka nisur asnjë përgatitje për “Shiko kush luan” dhe emisioni dating, që ishte parashikuar, nuk do të bëhet. Luana është një nga emrat që ka fituar shumë popullaritet në vitet e fundit në Top Channel. Ka një emision me emrin e vet dhe ka arritur të ngulisë idenë që “e shtuna është e Luanës”.
Po vetë Arbana ka thënë gjë? Tani për tani, jo.
Po më parë? “Të them të drejtën nuk e di [në do ta drejtoj unë sërish]. Unë kam dilemat e mia për rikthimin e formatit dhe realizimin e tij me standardet e dikurshme. Ka shumë faktorë që më bindin të drejtoj një program të caktuar. Me ‘Big Brother’ këta faktorë nuk i kam vlerësuar akoma,” tha në vitin 2019 në një intervistë për Revista Who. Në janar 2020, la ta hapur mundësinë e rikthimit, ndonëse nuk sqaroi nëse donte ta prezantonte ose nëse do ta prezantonte.
Po nëse Arbana ka qenë përgjithësisht skeptike ndaj “Big Brother”, ç’të bën të mendosh që ka interes tani? Ndoshta tani janë vënë gjërat në vijë. Shto edhe faktin që “Dua të të bëj të lumtur” mund të jetë në përfundim.
Kuptoj. Luana ka reaguar? Jo.
