Gazetari i Ora News Elio Laze dhe operatori janë kërcënuar nga punonjës të kompanisë Salillari, mbrëmjen e 23 marsit.
Stafi i Ora News ishte dje në mbrëmje në zonën e Unazës së Re. Ata kanë raportuar se kompania Salillari vazhdon të punojë megjithëse kjo aktualisht është e ndaluar nga masat dhe kufizimet e ashpra të marra nga qeveria Rama për të ndalur përhapjen e koronavirusit.
Gazetari iu afrua kantierit të ndërtimit për të filmuar punën dhe për të marrë një koment nga punëtorët.
Punonjësi i Salillari, një nga firmat e ndërtimit më pranë qeverisë Rama, u përgjigj me agresivitet verbal e fizik gazetarit Laze dhe e kërcënoi atë.
RTV Ora i bëri thirrje autoriteteve që të reagojnë pasi ky kërcënim dhe agresivitet ndaj gazetarit gjatë kohës së detyrës së tij është i papranueshëm:
“Është e papranueshme po ashtu që të lejohet thyerja e ndalim qarkullimit nga oligarkët.
Në kohën kur Shqipëria është e gjitha në ndalim qarkullimi, vetëm kompania Salillari lejohet të punojë në Unazën e re.”
Kompania Salillari ka përfituar rreth 56 milionë euro në tenderat e Unazës së Re, duke e çuar në 120 milionë euro totalin e tenderave publike të fituar në 3 vitet e fundit.
Të favorizuar nga qeveria dhe bashkia Tiranë, ata po fitojnë disa nga projektet më të mëdha shtetërore të Shqipërisë.
