Ju kujtohet koha kur Mira Kazhani moderonte “Wake Up” në “Top Channel”? Pas largimit, shumë zëra qarkullonin për të, por vetë ajo zgjodhi heshtjen. Gazetarja ka vendosur që të flasë dhe të tregojë të vërtetën që kërkonin të gjithë.
Për arsyet e largimit, gazetarja foli teksa ishte e ftuar në “Një kat më lart”, me Ermal Peçin.
“Jo, jo, ka qenë eksperiencë e mirë “Wake Up”, por nuk e shoh më, sepse pak a shumë e di se çfarë thuhet. Nuk pres ndonjë gjë të re. Kur të bëjnë ndonjë ndryshim të madh, do ta shoh me kënaqësi”.
Ajo pranoi se me Enon nuk shkonin dhe aq shumë, duke sjell në fokus edhe mënyrën e trajtimit të emisionit.
“Wake Up” nuk më ka shijuar shumë. [Unë dhe Eno] nuk ngjitëm, nuk shkonim, nuk puqeshim. Eno ishte natyrë tjetër, unë natyrë tjetër. Edhe mënyra si bëhej, si konceptohej emisioni në mëngjes, nuk ishte formula ime.
Emisioni i mëngjesit është emisioni më i bukur. Unë kam dashur gjithmonë ta bëja dhe ishte një lloj sakrifice nga ana ime.
Mua më ftuan, nuk kërkova të punoj në “Top Channel”. Edhe në “Big Brother” më kërkuan, më ra telefoni, kishin nevojë për mua, ju doli për mirë.
Në atë kohë, drejtor Enkel Joti, më ftoi të bëhesha pjesë e emisionit të mëngjesit, sepse nuk ishte në ditët më të mira të audiencës dhe në një farë forme, kërkuan të fusnin një lloj figure më të fortë si gazetare […] për t’i dhënë më shumë xixa. Nuk e di nëse ndodhi”.
Në lidhje me marrëdhënien që ka me Eno Popin: “Unë dhe Eno jemi miq. Është shumë simpatik, e kam si vëlla të vogël. Shkoja shumë mirë me Enon, por nuk puqeshim, nuk ngjiteshim. Nuk ka pasur asnjë luftë, shkonim shumë mirë”.
