Kreu i rregullatorit gjerman për vaksinat ka thënë se disa grupe njerëzish në Gjermani mund të vaksinohen qysh në fillim të vitit të ardhshëm, ndaj koronavirusit që ka lënë të paktën 800.000 të vdekur në botë dhe e ka dërrmuar ekonominë botërore.
Dhjetëra prodhues barnash në botë janë në fazën e testimeve klinike, secila me nga dhjetëra mijëra pjesëmarrës, teksa disa prej tyre pritet që deri në fund të vitit ta marrin vesh nëse vaksinat e tyre janë të sigurta dhe efektive, raporton Reuters, transmeton KOHA.
Klaus Cichutek, kreu i Institutit “Paul Erlich” u ka thënë disa gazetave gjermane se të dhënat nga faza e parë dhe faza e dytë e testimeve tregojnë që disa vaksina po e nxisin reagimin imunitar ndaj koronavirusit.
“Nëse të dhënat nga faza 3 e testimeve tregojnë se vaksinat janë efektive dhe të sigurta, atëherë ato mund të miratohen në fillim të vitit, mbase në mënyrë të kushtëzuar”, ka thënë ai.
“Bazuar në garancitë nga prodhuesit, dozat e para për qytetarët në Gjermani do të jenë në dispozicion atëherë”, ka thënë ai.