Hackerat serbë sulmojnë faqen e RTSH-së: ‘Kosova është zemra e Serbisë’

Hackerat serbë kanë sulmuar mbrëmjen e sotme faqen zyrtare të Radio Televizionit Publik Shqiptar, duke vendosur fotografi të djegies së flamurit shqiptar dhe mbishkrime si “Kosova është zemra e Serbisë”. Hackerat serbë kanë publikuar fotografinë e Ivan Bogdanov, teksa djeg flamurin shqiptar në stadiumin e Genovas në Itali. Sulmi ka zgjatur disa minuta, pasi ekspertët e RTSH-së kanë mundur ta rikthejnë faqen në normalitet.

Pas incidentit në stadiumin “Partizani” në Beograd duket se mes shqiptarëve dhe serbëve ka shpërthyer një luftë mes hackerave, të cilët vijonë të sulmojnë faqet kryesore të institucioneve të dy vendeve.

Në një komunikim në “News24”, drejtori i RTSH, Martin Leka tha se serbët po kthejnë një lojë futbolli në një histeri antishqiptare. Sipas Lekës, Kosova nuk do të jetë kurrë zemra e Serbisë, por gjithmonë zemra e Shqipërisë.

“Nuk mund të ndëshkohet historia me hackera. Shqiptarët autoktonë, siç kanë qenë dhe do të jenë. Kosova nuk është dhe nuk do jetë zemra e Serbisë”- deklaroi Leka.
96193_1
INCIDENTI NE STADIUM
Ndeshja e shumëpërfolur mes Serbisë dhe Shqipërisë degjeneroi në dhunë mbrëmjen e së martës në stadiumin “Partizani” në Beograd. Futbollistët e kombëtares shqiptare u goditën nga persona të jashtëm brenda në fushën e lojës dhe për pasojë takimi është ndërprerë në minutën e 41-të. Fillimisht tifozët serbë kanë hedhur në fushë tymuese dhe flakadanë, duke dhënë sinjalet e para që nuk do të ishte thjesht një ndeshje futbolli. Më pas ka ardhur shpikja më e fundit e teknologjisë, teksa një mjet fluturues ka shpalosur një flamur të Shqipërisë së Madhe, me mbishkrimin “Autoktonë”.

Në momentin që njëri nga futbollistët serbë e ka ulur me forcë, Lila dhe Xhaka kanë vrapuar në mënyrë që të merrnin simbolin shqiptar, por futbollistët serbë kanë sulmuar kuqezinjtë tanë. Por sikur mos mjaftonte kjo, tifozë serbë goditën futbollistët e Shqipërisë. Gjyqtari urdhëroi të dyja skuadrat të futen në dhomat e zhveshjes.

Burimi | Balkanweb