Mbeten akoma edhe dy javë nga fillimi i transmetimit të edicionit të dytë të “Dance with me”. Produksioni ka filluar përgatitjet prej javësh, por disa emra artistësh mbeten ende surprizë. Prej disa ditësh, shumë emra personazhesh të njohur janë lakuar në media, disa prej të cilëve janë konfirmuar, ndërsa disa të tjerë ende jo. Kështu, krahas aktorit të humorit Sejfulla Myftari, këngëtareve Albërie Hadërgjonaj, Ingrid Gjoni, moderatores Roza Lati dhe fituesit të Big Brother Vesel Kurtishaj, janë zbuluar edhe disa personazhe të tjerë.
Herion Mustaraj, aktori i njohur për rolin në filmin “Beni ecën vetë” është gjithashtu pjesë e këtij edicioni të “Dance with me.” Pavarësisht se ka jetuar shumë vite jashtë Shqipërisë, Herioni është rikthyer në vendlindje për projekte të reja artistike, në disa prej të cilave edhe guxon të eksperimentojë, si në kërcim.
